Banorët e Maliqit kanë dalë në protestë kundër propozimit për riorganizimin e ri territorial, që parashikon shkrirjen e 15 bashkive në vend, mes tyre edhe Bashkia Maliq.
Sipas propozimit të mazhorancës, Maliqi pritet të bashkohet me Bashkinë e Korçës. Banorët kundërshtojnë këtë ide dhe kërkojnë që Bashkia e Maliqit të vijojë të funksionojë si njësi më vete.
Protestuesit shprehen se nuk duan që Maliqi të bashkohet me Korçën, pasi, sipas tyre, Korça ka dështuar në ofrimin e shërbimeve dhe se ata nuk duan të mbulojnë problemet e saj.
Protestuesit kanë ngritur gjithashtu shqetësimin për gjendjen ekonomike dhe sociale të vendit, duke theksuar se Shqipëria është varfëruar dhe se një bashkim i tillë, sipas tyre, nuk do të sjellë përmirësim për banorët e Maliqit.
“Ne duam bashkinë këtu. Shërbimet i kemi këtu dhe nuk keni nevojë të bashkohemi me Bashkinë e Korçës”, u shprehën protestuesit.
Banorët kërkuan që për këtë çështje të zhvillohet një referendum dhe që vendimi për të ardhmen e bashkisë të merret nga vetë qytetarët.
“Të bëhet një referendum dhe ta vendosë populli”, ishte një tjetër kërkesë e protestuesve.
Gjatë protestës, disa prej banorëve ngritën edhe akuza ndaj qeverisë, duke pretenduar se qytetarët ndihen të kërcënuar dhe nuk kanë kurajë të shprehin hapur kundërshtimet e tyre.
“Këtu është krijuar një sistem diktature që i kërcënon dhe njerëzit nuk kanë kurajë të dalin”, deklaruan protestuesit.
Ndërsa një tjetër qytetar i Maliqit tha se: “Ramës i është bërë mendja resorte, kulla dhe koncerte dhe i ka harruar hallet e popullit”.
Discussion about this post