Banorët e Bërxullës kanë dalë sot të protestojnë para Hipotekës. Në një prononcim për mediat, një prej banorëve thotë se nuk do të lejojnë në asnjë mënyrë që të ndërtohet rruga.
Ai tha se sot kanë dalë para Hipotekës pasi u është sosur durimi duke protestuar në Bërxullë, ku asnjë nga pushtetarët nuk po u jep përgjigje.
“Prej disa kohësh titujt e pronësisë tona qëndrojnë në sirtarë dhe nuk na i japin. Më vjen një përgjigje dhe ku thuhet; se ju nuk mund ta merrni pronësinë, pasi shtëpia nuk ka çati. I bëj thirrje drejtorit të ri të Hipotekës, dhe zonjës Dallëndyshe që të vihen në lëvizje.
Që të zhvillohet rruga pa na dhënë neve titujt e certifikatës së pronësisë, s’do bëhet. Ne rrugën nuk do e lëmë të zhvillohet, sikur të na zhdukin të gjithëve. Po na soset durimi. Mirë që nuk kanë marrë asnjë masë për të nisur dëmshpërblimet e banesave, dhe të akomodoheshin diku, por s’kemi as titujt e pronësisë,”- tha banori.
Banorët e Bërxullës kanë 6 muaj që protestojnë kundër ndërtimit të aksit ‘Thumanë-Kashar’, segmenti 20.9 kilometrash pjesë e autostradës Milot –Fier. Me ndryshimin e projektit banorët deklarojnë se parashikohet të shemben banesat e tyre.
Ato nuk bien dakord me vlerën e shpronësimit për banesën dhe tokën. Të vendosur, thonë se ato do të mbrojnë tokat e tyre deri në vetëflijim, dhe se nuk do të lejojnë firmën ‘Gener 2’ të futet në tokat e tyre, pa arritur më parë një marrëveshje me to.
Discussion about this post