Mirë që u afruan zgjedhjet, që kryetari i Bashkisë Gjirokastër, Flamur Golemi, të hedhë një dorë zhavorr në rrugët e fshatrave të Kardhiqit dhe Lunxherisë. Tenderi u zvarrit gjashtë muaj deri sa rreth 300 milionë lekë shkuan në duart e Isuf Meçit, që favorizohet gjithmonë nga kryetari.
“Flamur i kuq” për tenderin e Flamur Golemit
Kryebashkiaku bën të të pamundurën për mikun e tij. “Skualifikim i të gjithë operatorëve konkurrues përveç fituesit/ Skualifikim i ofertës me vlerë më të ulët”, kështu e përshkruan tenderin Open Data Albania. Kjo procedurë është shënuar me “Flamur të kuq”, që tregon riskun e korrupsionit (Vlerësimi për këtë kategori bëhet në mënyre automatike, me filtra analitik të paracaktuar).
Bëhet fjalë për tenderin me objekt “Rehabilitimi i segmenteve të ndryshme rrugore” që ka filluar më 6 shtator 2024. Sipas dokumenteve të dorëzuara në Agjencinë e Prokurimit Publik, komisioni i Golemit ka përllogaritur se për këtë punë duhen 28 753 496,00 lekë, që dalin nga buxheti i bashkisë. Firmosja e tenderit i është deleguar me urdhër sekretarit të bashkisë, por dihet se kryetari vendos vetë për paratë që dalin nga arka.
Data e fundit për dorëzimin e dokumenteve nga pjesëmarrësit ishte caktuar 26 shtator 2024 dhe brenda asaj dite është mbajtur tenderi. Meqenëse nuk dilnin llogaritë ashtu siç ishte paracaktuar, është marrë vendimi që të anulohet tenderi. Pretendimi i fiksuar nga komisioni është se “nuk ka pasur asnjë ofertë të përshtatshme”.
Tenderi është rishpallur më 6 nëntor 2024 dhe më 26 nëntor ishte data e re e dorëzimit të dokumenteve. Këtë radhë u ndoq një mekanizëm tjetër për të favorizuar kompaninë që duhej të fitonte. Megjithëse në këtë procedurë u regjistruan 6 subjekte, nuk pati garë, por vetëm veprime të komisionit që eliminuan konkurrencën.
Kështu, në fund iu hap rruga shoqërisë EUROBETON SHPK. Por ç’ndodhi më tej? Projekti dhe kontrata e tenderit u futën në sirtar. U mbyll viti 2024, po mbaron muaji shkurt dhe nga ndërtesa tek sheshi “Çerçiz Topulli” nuk po delte “tym i bardhë”. Vetëm më 18 shkurt 2025, në Agjencinë e Prokurimeve u bë e ditur se kjo punë është firmosur me Isuf Meçin.
Oferta e Eurobetonit ishte më e shtrenjta
Komisioni e kishte një shqetësim që u vonua për marrjen e vendimit. Oferta e paracaktuar që të fitonte ishte më e shtrenjtë se e operatorëve të tjerë. Kështu, bashkia iu fut studimeve për të gjetur kleçka nëpër dosjet e kompanive konkurruese me qëllim që të justifikohej skualifikimi i tyre.
Shumica e të metave të konstatuara mund të eliminoheshin duke njoftuar operatorët brenda afatit të caktuar. Sepse ia vlente të kursehej fondi i prokuruar. Madje mund të anulohej tenderi përsëri. Megjithatë, u skualifikuan të gjitha ofertat më të ulëta.
Kështu, bashkimi i operatorëve RSM COMPANY shpk & DESARET COMPANY SHPK kishte ofertën 19 471 532 lekë pa tvsh. NIKA shpk propozonte ta kryente këtë punë me 19 858 966.5 lekë pa tvsh.
Ndërsa bashkimi i operatorëve TEA-D shpk & COGREN shpk e kishte vlerën e ofertës 20 869 345 lekë pa tvsh.
Duke qenë se pronari i EUROBETON shpk është mik i kryetarit, ka fituar me ofertën më të shtrenjtë se ata më sipër, me vlerën 21 747 214 leke pa tvsh.
Mashtrohen me çakëll banorët para zgjedhjeve
Tenderi përfshin disa rrugë fshatrash me gjatësi nga 500 metra deri në 1 kilometër me gjerësi mesatarisht 2.5 metra. Përpara zgjedhjeve do të nisin punimet dhe do të mbarojnë për 6 muaj. Shtrimi i tyre do të bëhet me çakëll, ashtu siç ka qenë, si dhe do të vendosen bordura betoni. Më konkretisht, në listë janë segmente në “Hundëkuq” (Odrie) “Prongji” (Cеро) “Gjat” (Lunxheri) “Shtepez” (Picar), Rruga lidhëse midis fshatrave Nokov-Mingul, “Plesat” (Ceро) “Valare” (Antigone) “Kodër” (Cеро) “Asim Zeneli ” (Antigone).
Sipas projektit të zbatimit “Në hapin përfundimtar konsistojmë me mbushje shtresë çakëlli…Ky çmim përfshin tërësinë e punimeve dhe punëtorisë që lidhen me mbushjen me cakëll natyror për profilimin e trupit të rrugës në thellësinë e dhënë”. Kërkuam më tepër në projekt, por nuk e pamë fjalën “asfalt” për shtrimin e rrugëve. Mbase do të hidhet beton në ndonjë pjesë rruge, meqenëse kompania e ka emrin “Eurobeton”. Shpresojmë që premtimi për banorët të mos mbetet në letër, por duke parë se si është zhvilluar tenderi, dyshojmë se kjo punë do të zvarritet edhe pas zgjedhjeve.
Kjo nuk është hera e parë që Flamur Golemi e favorizon në tendera Isuf Meçin. Në dhjetor 2022, Kryebashkiaku ka firmosur tenderin me objekt “Rikonstruksion rrugës Zhulat Gjirokastër loti I”, për të cilën ishin vënë në dispozicion 48 561 521,00 lekë (të reja).
Nga të dhënat e Open Data Albania rezulton se, tenderi në fjalë është dhënë pa konkurrencë. Për këtë tender kanë paraqitur ofertë 7 kompani, por të gjitha janë skualifikuar automatikisht dhe në garë mbeti vetëm bashkimi i operatorëve “BOE EUROBETON” dhe “INA shpk”, të cilat kanë ofruar 38.296.731 lekë.
Së pari, vërehej se kompanitë e tjera kishin paraqitur ofertë të paktën 100 milionë lekë më lirë nga fondi limit. Dhe pavarësisht kësaj, sërish Golemi zgjodhi ofertën më të shtrenjtë .
Më tutje, binte në sy se njëra nga kompanitë kishte ofruar zero lekë, pra është një pjesëmarrës fiktiv, që i ka hapur rrugë fituesit. Këto të dhëna hedhin dyshime se bashkimi i operatorëve “BOE EUROBETON” të Isuf Meçit dhe “INA shpk” të Ferdinand Çaushit, ishte paracaktuar si fitues.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post