Familjet që pretendojnë pronësinë e godinës 3 katëshe në rrugën “Margarita Tutulani” në Tiranë janë përplasur me forcat e Policisë së Shtetit ditën e sotme. Ata kanë tentuar të hyjnë në objekt ditën e sotme por u përballën me policinë. Në një prononcim për OraNews, banorët shprehen se janë nxjerrë nga objekti mbi bazën e një dokumenti të falsifikuar, duke shtuar se shteti po i kthen në të pastrehë, pavarësisht se kanë shtëpitë e tyre në atë godinë.
“Shkojmë për të hyrë në shtëpitë tona, policia na nxjerr përjashta. Po na i vjedhin ditën për diell. Ne që atëherë kemi hyrë me autorizim. Dokumentat i kemi në rregull. Përse të zvarritemi kështu? Prona është italiane. Na kanë nxjerrë përjashta me padrejtësinë më të madhe. Policia është në përkrahje të popullit, ne na nxjerrin jashta,”- thonë ata.
“E kemi provuar në prokurori që është pronë e flasifikuar dhe si duket çantat me lekë që ka ligji… Nuk bën vaki kjo punë. Prokuroria e nxjerr pronën e falsifikuar, Komisioni i Kthimit të Pronave, jurista ka ardhur para gjykatës e ka shpjeguar që kjo është pronë e falsifikuar dhe prapë fiton çanta me lekë,”-shtojnë të tjerë banorë.
Ky konflikt ka nisur prej vitesh. Pallati rezulton i ndërtuar që prej periudhës së regjimit italian në Shqipëri, në vitin 1941. Në vitin 1980, banorët u futën në këtë godinë me një kontratë ku paguanin një kuotë qiraje mujore, por një VKM në vitin 2013 e kaloi në pronë të shtetit. Banorët po vijojnë luftën e tyre në gjykata, por paralelisht herë pas herë janë revoltuar, duke u futur dhe në grevë urie.
Discussion about this post