Teuta dhe Tirana u ndanë në barazim 1-1 në stadiumin “Niko Dovana”, një rezultat që nuk i shërben asnjërës skuadër. Durrsakët humbën terren në garën për një vend në “Final 4”, ndërsa bardheblutë morën vetëm një pikë që thuajse nuk i ndryshon asgjë situatën, duke mbetur të fundit në renditje me 8 pikë.
Sfida nisi me ritëm të lartë dhe ishte Tirana që befasoi që në minutën e 4-t. Ndong udhëhoqi një kundërsulm të shpejtë, shkëmbeu me Falajen dhe pasi mori topin në zonë, finalizoi saktë për 0-1, duke shtangur vendasit. Reagimi i Teutës ishte gradual, me më shumë zotërim topi, por pa hapësira të pastra për goditje.
Në minutën e 24-t, Tirana gjeti sërish rrjetën me Falajen pas një kundërsulmi tjetër, por goli u anulua për pozicion jashtë loje, vendim i konfirmuar edhe nga VAR-i. Katër minuta më pas, një kontakt mes Jurgens-it dhe Lleshit në zonë solli penallti për Teutën, të akorduar nga gjyqtari Barjamaj. Nga pika e bardhë, në minutën e 31-të, Beshiraj u tregua i saktë dhe barazoi shifrat në 1-1.
Pjesa e parë pati edhe një rast të artë për Teutën, kur në minutën e 33-t Beshiraj harkoi saktë nga e djathta për Arifin, por Tafas ndërhyri në momentin vendimtar.
Pjesa e dytë u shoqërua edhe me tensione jashtë lojës. Tirana refuzoi për disa minuta të dilte në fushë në shenjë proteste ndaj vendimeve të arbitrit, ndërsa lojtarët e Teutës qëndruan pranë pankinës në pritje të rifillimit. Loja vazhdoi, por rastet ishin të pakta. Në minutën e 68-t, Marku provoi një gjuajtje që u shndërrua në asist për Falajen, por sulmuesi nuk arriti të mposhtte Selmanin dhe u ndal nga ndërhyrja e portierit. Në kohën shtesë Tirana është me fat në dy goditje të njëpasnjëshme të vebndasve, shtylla dhe Tafas i mohojnë golin Teutës.
Në fund, rezultati mbeti i pandryshuar, duke lënë të dyja skuadrat të pakënaqura me një barazim që vlen pak në objektivat e tyre.
Discussion about this post