Barcelona mori tri pikët e radhës në La Liga përballë Celta Vigos, për të ruajtur kryen e renditjes, por ashtu si në ndeshjen me Mallorcan, vuajti shumë për të ruajtur epërsinë minimale të arritur që në minutat e para të lojës. Goli i Pedrit, edhe për “meritë” të mbrojtjes së Celtës, i shënuar në minutën e 17-të dha përshtypjen se “blaugranata” do të merrnin një sukses të lehtë, por nuk rezultoi kështu.
Celta pati rastet e saj për të shënuar, madje të pastra, si dhe iu anulua një gol për pozicion jashtë loje të shënuar nga Jorgen Strand Larsen në minutën e 68-të.
Sidomos fraksioni i dytë ishte i dobët për Barcelonën, që shpëtoi paq në rastet që iu paraqitën emrave të tillë si: Oscar Rodriguez, Iago Aspas, Hugo Mallo.
Gjithsesi, në fund rëndësi ka fitorja dhe pikët e fituara, që e mbajnë Barcelonën në krye me golavarazh më të mirë se Reali i Madridit, skuadër me të cilën skuadra e Xavi Hernandezit do të përballet më 16 tetor.
Discussion about this post