Boca Juniors është shpallur fituese e “Maradona Cup” në ndeshjen përballë Barcelonës që shkoi me penallti. Ndeshja u mbajt në nder të legjendës Diego Armando Maradona, i cili u nda nga jeta vitin e kaluar. “El Pibe de Oro” luajti për të dyja klubet gjatë karrierës së tij të shkëlqyer.
Ndërkohë, sa i përket ndeshjes, katalanasit nuk po dinë të fitojnë as në miqësore, ndërsa i mbyllën 90 minutat e kohës së rregullt me barazimin 1-1 dhe u vunë jo pak herë në vështirësi. Blaugranët gabuan dy herë nga pika e bardhë, ndërkohë që argjentinasit nuk humbën asnjë mundësi për të shënuar.
Barcelona shënoi golin e parë me Jutgla në minutën e e 50-të, por Boca Juniors nuk u dorëzua dhe barazoi në të 77-ën.
Argjentinasit i vunë në vështirësi të besuarit e Xavit në jo pak raste, dhe rrezikuan të kalonin në avantazh, por ishte Neto ai që e mbajti portën të paprekur deri sa skuadrat i mbyllën 90 minutat me një barazim.
Në këtë ndeshje Xavi luajti kryesisht me lojtarë të rinj dhe la pushim veteranët si Busquets, Pique apo Frenkie de Jong. Megjithatë ajo që ra në sy ishte rikthimi i Dani Alves në formacionin e Barcelonës për herë të parë pas 5 vitesh. Braziliani mbajti edhe shiritin e kapitenit në pjesën e dytë të takimit.
Discussion about this post