Sekretari i Përgjithshëm i Partisë Demokratike zyrtare, Gazment Bardhi, në një deklaratë për mediat, pas mbledhjes së Këshillit Kombëtar, tha se ky nuk është një moment për të krijuar një ngërç të ri në parti.
Ai i drejtoi një apel ish-kryetarit demokrat, Lulzim Basha, por edhe të gjithë faktorëve të tjerë të partisë që të mos krijojnë rrëmuja anti-statutore dhe se truket për interesa personale duhet të lihen mënjanë.
“Apeli im për zotin Basha dhe çdo faktorë brenda Partisë Demokratike është të reflektojë të mos çojë partinë në një tjetër përplasje, të gjejë një zgjidhje që është interesi i demokratëve dhe i partisë demokratike. Ky nuk është momenti që në Partinë Demokratike të ketë akte anti-statutore që nuk prodhojnë asgjë veçse një ngërç të ri e një rrëmujë në Partinë Demokratike, por nuk kanë asnjë vlerë statutore apo ligjore.
Në një proces anti-statutor edhe zoti Berisha pretendon se është kryetar i Partisë Demokratike. Duhet të funksionojë rruga statutore dhe institucionale, të lihen mënjanë truket për interesa personale dhe cilido në një garë sipas statutit është i lirë të marrë pjesë”, tha Gazment Bardhi.
Discussion about this post