Kryetari i Grupit Parlamentar të PD-së, Gazment Bardhi, ka reaguar pas përfundimit të seancës parlamentare, duke akuzuar Presidentin Bajram Begaj se u soll si ministër i propagandës së Edi Ramës.
Begaj pritej të mbante një fjalim në Kuvend, por Bardhi tha se ky ishte një provokim i ulët nga ana e Presidentit të Republikës, pasi ai është njoftuar prej kohësh se Kuvendi nuk funksionon normalisht.
Ai theksoi se nëse Bajram Begaj zgjedh të sillet si vartës i Edi Ramës, atëherë ai do të trajtohet si i tillë nga opozita.
“Edi Ramës i jepet pushteti në tavolinë, nuk ka sistem proporcional. Ripërsëritja e një skenari që opozitarët e kanë parë në vitin 2020.
Sa i takon seancës së sotme, u njohëm përmes medias që Presidenti do jepte një mesazh. Zyrtarisht Presidenti është njoftuar se Kuvendi prej 3 muajsh nuk funksionon normalisht për shkak të mohimit të të drejtave tona.
Presidenti nuk është zgjedhur tani, ai nuk ka ardhur në disa sesione parlamentare për t’iu drejtuar Kuvendit. Ky ishte një provokim i ulët i presidentit të Republikës. I bëj thirrje të heqë dorë si i njëanshëm dhe vartës i mazhorancës dhe të respektojë kolltukun e Kreut të Shtetit. Nëse zoti Begaj zgjedh të sillet si vartës i Edi Ramës, atëherë ai do të trajtohet si i tillë nga opozita”, tha ai.
Në vijim, kreu i Grupit Parlamentar të PD-së u shpreh se deputetët socialistë ishin njoftuar se Kreu i Shtetit do të mbante një fjalë, ndërsa kjo nuk ishte në rendin e ditës së punimeve të seancës.
“Nuk e di nëse Presidenti u urdhërua për të mbajtur fjalën apo ai ka zgjedhur të bëhet palë, por unë nuk e di që Presidenti i Republikës, të bëhet palë me Qeverinë dhe mos qëndrojë mbi palët”, tha Bardhi.
Discussion about this post