Deputeti i Partisë Demokratike, Gazment Bardhi u shpreh se vendimi për seancën e mbajtur sot, dhe jo të enjten sipas rregullore së Kuvendit, është një i njëanshëm.
Bardhi tha se zhvendosja e datës duhet të merrte miratimin e opozitës. Kësaj pyetje Ermonala Felaj u përgjigj duke thënë se kalendari u miratua para një javë dhe se opozita nuk pati asnjë kundërshtim.
Po ashtu Bardhi u ndal te kërkesa për interpelancë me kryeministrin Edi Rama, që nuk është pjesë e agjendës së ditës. Në lidhje me këtë pyetje socialistja Felaj tha se përgjigjja i është dhënë nga kryetarja e Kuvendit, Lindita Nikolla ditën e djeshme.
Pjesë nga diskutimi në seancën plenare:
Bardhi: Kam dy çështje për procedurë! Njëra pse keni vendosur që kuvendin ta trajtoni dsi dyqan personal, prandaj në cilësinë e drejtueses së seancës të sqaroni pse është zhvendosur seanca nga dita e enjte, që është një rregull i shkruar, për të mërkurën.
Kemi detyrimin, sepse keni marrë këtë vendim të njëanshëm.
Nëse është ajo arsyeja e publikuar në media, është një akt i turpshëm dhe distancoheni nga ajo arsye banale.
Së dyti, me kërkesën 2319 protokolli datë 10/6/2024, depozituar brenda afatit, një grup deputetësh të OPD, kanë kërkuar interpelancë urgjente me Edi Ramën për keqpërdorimin e fondeve publike.
Kërkesa, nëse firmoset nga 7 deputetë, sipas kushtetutës përfshihet si pika e parë e rendit të ditës. Kemi marrë një përgjigje banale, sepse jeni kthyer në banal në gjithçka bëni në këtë Kuvend, që një kërkesë të deputetëve për t’i kërkuar llogari kryeministrit. për të na e cilësojnë si cenim të nderit të kryeministrit. Kryeministri po të kishte dinjitet mos t’u japë tendera familjarëve të tij. Ju jo vetëm nuk e njoftuat, por pasi keni refuzuar interpelancën, po shkelni dhe të drejtën e kolegëve për të sqaruar seancën plenare mbi arsyet e kësaj interpelance.
Felaj: Është vendim i konferencës së thirrur rregullisht, ku ju nuk denjuat të merrnit pjesë. Nuk jam e detyruar t’u japë asnjë shpjegim sa kohë nuk merri pjesë në mbledhjet e konferencës.
Discussion about this post