Kryetari i Grupit Parlamentar të Partisë Demokratike, Gazment Bardhi, ka reaguar ashpër pas ndryshimeve të propozuara në ligj që prekin Këshillin Kombëtar të Integrimit Europian (KKIE). Sipas Bardhit, mazhoranca synon të marrë nën kontroll edhe këtë forum parlamentar, që deri më sot ka qenë i drejtuar nga opozita.
Në një postim në rrjetet sociale, Bardhi akuzon kryeministrin Edi Rama për një “etje të pashuar për pushtet” dhe e cilëson vendimin për të bashkëdrejtuar Këshillin e Integrimit si një hap të rrezikshëm për funksionimin demokratik të institucioneve.
“Këshilli i Integrimit nuk u krijua për t’i shërbyer kryeministrit, por Shqipërisë – të marrë zvarrë nga i njëjti kryeministër që vonoi 15 vjet nisjen e negociatave me BE-në,” shkruan Bardhi.
Ai kujton se KKIE është themeluar në vitin 2015, sipas modelit kroat, për të garantuar gjithëpërfshirjen në procesin e integrimit, si dhe për të forcuar roli institucional i opozitës në një nga proceset më të rëndësishme për të ardhmen e vendit.
“Vetëm një i pangopur me pushtet mund të kërkojë të marrë nën kontroll edhe një organizëm parlamentar këshillimor,” vijon Bardhi, duke paralajmëruar se kjo qasje minon demokracinë dhe funksionimin korrekt të parlamentit.
Në fund të reagimit të tij, ai ironizon me një deklaratë të drejtpërdrejtë:
“Mos u habisni kur Edi Rama të dojë të bëjë edhe punën e ambasadorit të BE-së në Tiranë.”
Partia Demokratike e cilëson këtë nismë si një regres të papranueshëm dhe paralajmëron se do ta kundërshtojë çdo përpjekje për të personalizuar procesin e integrimit europian, i cili sipas saj duhet të mbetet gjithëpërfshirës, demokratik dhe i ndarë nga logjika e pushtetit absolut.
Postimi i plote:
Këshilli Kombëtar i Integrimit Europian është forumi më i lartë këshillimor për procesin e anëtarësimit në BE. Ai u krijua në vitin 2015 sipas modelit kroat, jo si pronë e një partie, por për gjithëpërfshirje në proces, për rritje të transparencës, për komunikim me publikun, për afirmim të rolit të opozitës në proces. Për këtë arsye, që nga dita e parë, drejtimi i Këshillit i është lënë opozitës. Por sot, Edi Rama ka kërkuar t’ia marrë edhe këtë hapësirë parlamentare opozitës, duke kërkuar bashkëdrejtimin e Këshillit të Integrimit.
Vetëm një i pangopur me pushtet mund të kërkojë të marrë nën kontroll edhe një organizëm parlamentar këshillimor. Të mos mjaftohesh as me qeverinë, as me Kuvendin, as me pushtetin lokal dhe as me kontrollin e të gjitha pushteteve në vend, është një obsesion i rrezikshëm i pushtetarit që ka gjithçka dhe nuk e kënaq më asgjë.
Këshilli i Integrimit nuk u krijua për t’i shërbyer kryeministrit, por Shqipërisë të marrë zvarrë nga i njëjti kryeministër, që vonoi 15 vjet nisjen e negociatave të anëtarësimit me Bashkimin Europian.
Me obsesionin e etjes së pashuar për pushtet, mos u habisni kur Edi Rama të dojë të bëjë edhe punën e ambasadorit të BE-së në Tiranë!
Për Grupin Parlamentar të PD ky është një regres i papranueshëm në hapësirën dhe rolin institucional që ka opozita në Kuvend dhe në procesin e integrimit. Procesi i integrimit europian duhet të mbetet gjithëpërfshirës dhe demokratik. Çdo përpjekje për ta kthyer në pronë personale është një hap prapa për vendin dhe nuk i shërben aspiratës së përbashkët për anëtarësim në BE.
Discussion about this post