Kryetari i Grupit Parlamentar të PD dhe deputeti Gazment Bardhi ka bërë me dije se i ka komunikuar delegacionit të Parlamentit Europian problemet dhe nevojën që sipas tij Shqipëria ka për një reforme zgjedhore të plotë dhe gjithëpërfshirëse.
Me anë të një postimi në Twitter, Bardhi ka bërë me dije se në takimin që ka zhvilluar sot me delegatët, ka diskutuar edhe mbi forcimin e luftës kundër korrupsionit dhe krimit të organizuar.
“Kënaqësi takimi me delegacionin e Parlamentit Europian, me të cilët shprehëm qëndrimin për nevojën imediate që ka Shqipëria për një reformë zgjedhore të plotë dhe gjithëpërfshirëse; si dhe forcimin e luftës kundër korrupsionit dhe krimit të organizuar”, shkruan Bardhi.
Deputeti demokrat nuk ka kursyer as akuzat nga kryeministrit Rama teksa citon se “Keqqeverisja e Edi Ramës ka tashmë tiparet e plota të kapjes së shtetit, si forma më e lartë e korrupsionit”.
“Kjo nuk po e lejon Shqipërinë të bëjë përpara, duke devijuar nga e vetmja rrugë e sigurt e së ardhmes, që është antarësimi në Bashkimin Europian”, deklaron Bardhi.
Discussion about this post