Deputeti i Partisë Demokratike, Gazment Bardhi, ka reaguar me anë të një postimi në rrjetin social “Facebook”, pas përplasjes që pati me Kryeministrin Rama në seancën e sotme plenare.
Bardhi, i cili u përjashtua nga seanca pas përplasjeve me kreun e qeverisë, shkruan ndër të tjera se shqetësimi i ngritur prej tij sot në Kuvend, ishte shumë serioz dhe kjo ishte arsyeja që, sipas tij, Kryeministri reagoi në atë mënyrë, duke fyer.
Reagimi
“Shqetësimi që ngrita sot në Parlament është shume serioz. Dhe për shkak se është i vërtetë kjo solli shpërfytyrimin e Kryeministrit, i cili prej denoncimit që bëra, kaloi ne një gjendje rrobotike, ku vetëm nxirrte fyerje teksa hapte e mbyllte shishen e ujit pavetëdijshëm.
Fakti është se oligarkët e tij, dhe të fortët që ka nën hyqëm, kane tentuar fillimisht të joshin, më pas të shantazhojnë deputetë e deputete për të siguruar vota për të dërguar Dvoranin në Kushtetuese. Kjo është shumë e rendë. Tregon gjendjen e shtetit dhe demokracisë kur po hyjmë në vitin e 10 të qeverisjes së Ramës.
Çfarë bënte më shumë Coza Nostra në Itali. Ja këtë bënte. Caktonte gjykatësit e zyrtarët e lartë përmes lidhjeve politike e presionit. Kjo është drama e këtij vendi, jo fyerjet e Ramës, apo përjashtimi im nga seanca.
Dhe, me thoni ju, si mund t’i drejtohem ndryshe, përveçse mafioz, kur ai vetë është në dijeni të plotë të këtij operacioni. Madje, bëhet nën kujdesin e posaçëm të Kryeministrit, siç ai ka qejf t’i emërtojë eventet“, shprehet Bardhi.
Discussion about this post