Bardhi pyet Spiropalin: Çfarë dhurate të ka bërë Pëllumb Gjoka për…?

Kryetari i grupit parlamentar të Partisë Demokratike, Gazment Bardhi i është përgjigjur kryeparlamentares Elisa Spiropali, pasi kjo e fundit me një reagim të saj, shkruante se edhe garditët janë bij nënash dhe baballarë fëmijësh.

Bardhi shkruan në një postim në ‘X’ se përveç dhunës, çfarë dhurate i ka bërë Pëllumb Gjoka, Spiropalit me rastin e detyrës së re.

‘Pyetje publike për Kryetaren e Kuvendit: Përveç “dhuratës” së administratës a mund të informosh shqiptarët: Pëllumb Gjoka çfarë dhurate të ka bërë për detyrën e re?’, shkruan Gazment Bardhi në postimin e tij në rrjetin social ‘X’.

Deputetët e opozitës nuk janë lejuar që sot të futën në Parlament, për shkak se ata u përjashtuan nga Sekretariati i Etikës për shkak të kaosit dhe tensioneve që shkaktuan në seancën e të hënës, ku edhe dogjën karriget.

Gjithashtu, po në seancën e të hënës, deputeti Gazment Bardhi qëlloi me këmbën e karriges në drejtim të kryetares së Kuvendit, e cila tha sot se “ia kishin bërë dhuratë të vendosur në një kornizë”.

“Dje vonë në mbrëmje një grup nga stafi mbështetës i Kuvendit më bëri dhuratën më interesante dhe më të pakëndshme që kam marrë ndonjëherë. Një copë druri brenda një kornize xhami. Copa e drurit, këmba e karriges, që një eksponentë i opozitës e hodhi drejt meje për të më goditur. E di që më ruajti fati dhe paaftësia e goditësit për të më qëlluar në shenjë. Si njeri e kam falur, si politikane nuk mund të mos them dy fjalë: Pse kjo egërsi? Pse edhe në vendin ku duhet të mbretërojë dialogu dhe arsyeja dhe jo instikti primitiv thirret në ndihmë dhuna e verbër? Nuk kemi as mundësi as kohë të shtjellojmë arsyet. Po ju them vetëm rolin balancues të pushtetit gjyqësor. Ka ndodhur këtu ku prokuroret e përgjithshëm të këtij vendi shiheshin si vartës, trajtoheshin si kundërshtarë dhe luftoheshin si armiq”, tha kryetarja e Kuvendit.

Pyetje publike për Kryetaren e Kuvendit: Përveç “dhuratës” së adminstratës a mund të informosh shqiptarët: Pëllumb Gjoka çfarë dhurate të ka bërë për detyrën e re?

— Gazment Bardhi (@GazmentBardhi) October 3, 2024