Gazment Bardhi, kryetar i Grupit Parlamentar të PD-së, ishte një tjetër ligjvënës që nuk ishte prezent në ceremoninë e organizuar nga Kryeministri Edi Rama në nder të ish-Presidentit amerikan, Bill Clinton, të cilit iu akordua medalja “Ylli i Mirënjohjes”.
Sipas raportimeve, Bardhi ka qenë ndër deputetët e ftuar nga protokolli që është marrë me organizimin e ceremonisë, por ai ka refuzuar të marrë pjesë, raporton Panorama.
“Presidenti Klinton është mik i Shqipërisë, shqiptarëve dhe kombit shqiptar. Çdo shqiptar i është përjetë mirënjohës Presidentit Klinton për atë që ka bërë për kombin shqiptar dhe veçanërisht për Kosovën.
Figura e Presidentit Klinton meriton vlerësimin e të gjithë kombit shqiptar dhe çdo vlerësim i figurës së tij mund dhe duhet të bëhej nga Presidenti i Republikës me dekoratën më të lartë shtetërore.
Sot nuk ka pasur një ceremoni shtetërore të nderimit të rolit dhe figurës së tij, por një ceremoni private të Edi Ramës, diktuar që në ftesë. Pjesë e shout të Edi Ramës kam refuzuar dhe do të refuzoj gjithmonë të bëhem pjesë”, mësohet të jetë shprehur Gazment Bardhi.
Discussion about this post