Teksa iu ka referuar raportimeve mediatike lidhur me skemën ‘5B’, siç njihet ndryshe korrupsioni i Belinda Ballukut dhe vartësve të saj, Kreu i Grupit Parlamentar të PD, Gazment Bardhi, njëkohësisht drejtues politik në Qarkun e Fierit thotë se Shqipëria, gjatë gjithë historisë së saj, nuk ka pasur kurrë skemë më korruptive, sesa vrasja e konkurrencës së lirë dhe përfitimi i fondeve publike nga vetë zyrtarët e lartë të qeverisë.
Kjo sipas Bardhit, skema e zbuluar fillimisht në Bashkinë e Tiranës, rezulton se është e shtrirë në çdo institucion publik gjatë qeverisjes së Edi Ramës.
Në reagimin e tij, Bardhi shton se të dhënat e zbuluara nga investigimi i emisionit PLUG, provojnë se kompanitë në pronësi të të afërmeve të dy prej drejtorëve më të besuar të Belinda Ballukut, Ceno Klosi dhe Spartak Kovaçi, përllogaritet të kenë marrë të paktën 32 milionë euro tendera, prona publike, leje ndërtimi madje edhe me firmë të kryeministrit Edi Rama.
Për Bardhin, Ceno Klosi është anëtari më aktiv i bandës elektorale të PS në Fier, ku pavarësisht dosjeve që janë depozituar për të në SPAK prej vitesh, Belinda Balluku e fshehu përkohësisht në listat e kandidatëve për deputet, duke shfrytëzuar pasurinë e paligjshme për deformimin e vullnetit të zgjedhësve.
Bardhi i bëri sërish thirrje SPAK, që strategjinë e goditjes së korrupsionit dhe krimeve elektorale të mos e lërë vetëm në letër.
Reagimi
Në historinë e Shqipërisë nuk ka patur kurrë skemë më korruptive sesa vrasja e konkurrencës së lirë dhe përfitimi i fondeve publike nga vetë zyrtarët e lartë të qeverisë. Kjo skemë e zbuluar fillimisht në Bashkinë e Tiranës rezulton se është e shtrirë në çdo institucion publik gjatë qeverisjes së Edi Ramës.
Të dhënat e zbuluara dje nga investigimi profesional i gazetarëve të emisionit PLUG, provojnë se kompanitë në pronësi të të afërmeve të dy ndër drejtorët më të besuar të Belinda Ballukut, Ceno Klosi dhe Spartak Kovaçi, që veç lidhjeve të gjakut, gëzojnë edhe besimin e shefes së tyre, përllogaritet të kenë marrë të paktën 32 milionë euro tendera, prona publike, leje ndërtimi madje edhe me firmë të kryeministrit Edi Rama.
Skema kriminale “5B” e Belinda Ballukut, e zbërthyer nga emisioni investigativ “Plug”, shpjegon edhe importimin e kreut të kësaj skeme Ceno Klosi në listat për deputet të PS në qarkun Fier. 32 milion euro të përfituara nga fondet publike, janë mjaftueshëm për të deformuar vullnetin e qytetarëve të zgjedhje.
Ceno Klosi është anëtari më aktiv i bandës elektorale të PS në Fier. Edhe pse me disa dosje në SPAK, tashmë prej vitesh, por për fat të keq ende të pafinalizuara, Belinda Balluku e fshehu përkohësisht në listat e kandidatëve për deputet, duke shfrytëzuar pasurinë e paligjshme për deformimin e vullnetit të zgjedhësve.
Gjej rastin të apeloj edhe njeherë Prokurorinë e Posaçme që strategjinë e goditjes së korrupsionit dhe krimeve elektorale të mos e lërë vetëm në letër. Këto janë ditët që ndajnë nëse strategjia është bërë si mjet propagande për të shpërlarë korrupsionin qeveritar dhe zgjedhor të Edi Ramës, Belinda Ballukut dhe bandave të tyre elektorale, apo është vullnet real i prokurorëve të posaçëm për të parandaluar dhe goditur krimet zgjedhore dhe korrupsionin qeveritar.
Discussion about this post