Inspektorati Shtetëror Shëndetësor ka evidentuar një sërë problematikash shqetësuese në tregun farmaceutik gjatë vitit 2024, sipas raportit vjetor të sapopublikuar. Gjatë inspektimeve në farmaci dhe depo farmaceutike, janë konstatuar shkelje që lidhen drejtpërdrejt me sigurinë e barnave dhe mbrojtjen e shëndetit të qytetarëve.
Një ndër mangësitë më të përhapura rezulton të jetë mungesa e Akt-Miratimit higjieno-sanitar në subjektet e kontrolluara. Po ashtu, Inspektorati thekson se në shumë raste nuk ka dokumentacion mbi mënyrën e trajtimit të medikamenteve të skaduara, pasi subjektet nuk mbajnë kontrata me kompani të licencuara për evadimin e tyre.
Situata paraqitet edhe më problematike në disa ambiente farmaceutike ku është konstatuar prani lagështire, një faktor që rrezikon drejtpërdrejt cilësinë dhe efikasitetin e barnave të ruajtura dhe të shitura.
Për këto shkelje, gjatë vitit 2024 Inspektorati Shëndetësor ka vendosur: 1 masë administrative (gjobë), 1 vendim të ndërmjetëm për marrje mase urgjente dhe 14 paralajmërime.
Nga paralajmërimet, 13 i përkasin qarkut të Fierit dhe 1 qarkut të Tiranës. Gjoba është vendosur në një farmaci në Fier, ndërsa masa urgjente është marrë ndaj një subjekti farmaceutik në Durrës.
Raporti nënvizon nevojën për kontroll më të rreptë dhe respektim rigoroz të standardeve, me qëllim garantimin e një tregu farmaceutik të sigurt dhe në shërbim të shëndetit publik.
Discussion about this post