Kosova dhe Shqipëria kryesojnë listën e vendeve në sondazhin e Këshillit të Bashkëpunimit Rajonal, sa i takon përqindjes së lartë të qytetarëve që nuk shikojnë në ardhme në vendet e tyre dhe duan të largohen.
Në Kosovë, 57 % e të anketuarve do të merrnin në konsideratë që të jetonin dhe punonin jashtë vendit, ndërsa në Shqipëri 49 % e të anketuarve kanë të njëjtin mendim.
Por krahasuar me 2022, ndërsa në Kosovë ka një përmirësim, pasi shifra ishte në kuotën e 59%, në Shqipëri ajo që bie në sy është fakti se nga 42 % që ishte 1 vit më parë, në 2023-in mendojnë largimin 7% më shumë.
Shtetasit që mendojnë të lëvizin më pak janë atë të Maqedonisë së Veriut, 35%, Bosnje Hercegovinës, 38%, Serbisë 41%, Malit të Zi 45%.
Mesatarja e Ballkanit Perëndimor është 44%.
Sondazhi
Për të nëntën herë radhazi, Këshilli i Bashkëpunimit Rajonal publikon rezultatet e Barometrit Ballkanik – sondazhi vjetor i realizuar me gjashtë mijë qytetarë nga i gjithë Ballkani Perëndimor, duke dhënë një pasqyrë mbi opinionet e tyre rreth bashkëpunimit rajonal, integrimit në BE, besimit tek institucionet publike dhe media, shqetësimet e tyre më të mëdha, punësimi, ndryshimet klimatike, siguria, jeta digjitale, transporti, sundimi i ligjit, udhëtimet, etj.
Sipas njoftimit për shtyp, ‘Barometri Ballkanik’ zbulon 3 tendencat kryesore të opinionit publik në Ballkanin Perëndimor.
Së pari, lajmi i mirë, 76% e njerëzve besojnë se bashkëpunimi rajonal është i mirë për zhvillimin e ekonomive të tyre.
Për më tepër, 69% janë dakord se ajo që i bashkon qytetarët e Ballkanit Perëndimor është më e rëndësishme se ajo që i ndan ata.
Lajmi i dytë, mbështetja për integrimin në BE: rezulton 59% ose 3% më pak se në 2021.
Dhe i treti është shqetësimi mbi shpopullimin, pasi 44% mendojnë të jetojnë jashtë vendit, 5% më shumë se në 2022. Është gjithashtu jashtëzakonisht shqetësuese se 71% e të rinjve po mendojnë të largohen nga vendi i tyre”, tha Sekretarja e Përgjithshme e RCC, Majlinda Bregu.
Balkan Barometri 2023, edicioni i Opinionit Publik rezultatet kryesore:
➢ 1 në 5 qytetarë e lidh Ballkanin me shpresë ose bashkëpunim.
➢ Për 15% të qytetarëve, Ballkani do të thotë besim, por për 1 në 10, do të thotë frikë.
➢ 51% janë të pakënaqur me situatën ekonomike
➢ 27% thonë se korrupsioni është problemi më i madh
➢ 69% thonë se ligji nuk zbatohet për të gjithë në mënyrë të barabartë – 7% më shumë se në 2022
➢ 45% ndihen të kërcënuar nga mbajtja dhe keqpërdorimi i paligjshëm i armëve
➢ 71% thonë se lufta në Ukrainë ndikoi ndjeshëm në fuqinë e tyre blerëse
➢ 75% nuk u besojnë partive politike
➢ 65% shprehën një shqetësim të shtuar në lidhje me përhapjen e lajmeve të rreme.
Discussion about this post