Deputetët e Partisë Demokratike i binden urdhrit të kryetarit për të votuar në Kuvend projektligjet e propozuara nga socialistet ndryshe nga qëndrimet që mbajnë në opinionin publik. Prej kohësh deputetë të Partisë Demokratike kanë hedhur akuza ndaj OSHEE menaxhimit dhe abuzimeve të mëdha me fondet publike, por nga ana tjetër ata nuk kanë guxuar t’u qëndrojnë këtyre deklaratave dhe të votojnë kundër në kuvend por kanë abstenuar.
Kryetari i Partisë Demokratike Lulzim Basha përpara nisjes së seancës plenare të së enjtes ka urdhëruar deputetët se si të votojnë në pikat që janë në rendin e ditës. Ndonëse detajet janë takuar në mbledhjet rutinë që bëhen përpara seancës në selinë blu, serish deputetëve demokratë u ka mbërritur një mesazh në të cilin shkruhet: “Përshëndetje! Për kujtesë për votimin: 1- Projektligji për Eurobond, votimi pro; 2- projektligji për huanë e OSHEE – abstenim; 3- projektligji për buxhetin faktik – kundër; 4- projektvendimi për ngritjen e komisionit hetimor për inceneratorët “PRO” sipas propozimit të PD”.
Siç duket qartë në mesazhin e mësipërm për projektligjin për Eurobondin të votohej pro. Pra demokratët janë pro vendimit të mazhorancës, por 12 minuta më vonë në telefonin e deputetëve ka mbërritur një tjetër mesazh në të cilin thuhej: “Më falni, ka një gabim, eurobond abstenim”.
Pjesa më e madhe e deputetëve u bindën symbyllur e siç duket në ketë njoftim të Kuvendit, për borxhin 700 milionë euro kanë votuar pro 78 deputetë të Partisë Socialiste e aleate si dhe 33 deputetë të Partisë Demokratike kanë abstenuar dhe vetëm 4 vota janë regjistruar kundër nga sekretaria e Kuvendit. E njëjta panoramë edhe për kredinë 70 milionë euro të OSHEE-së, ku kanë votuar pro 76 deputetë, 36 demokratë kanë abstenuar dhe vetëm 3 vota janë regjistruar kundër.
NNdonëse në deklaratat zyrtare PD vazhdimisht ka patur kritika për eurobondin, asnjëherë nuk ka dalë kundër marrjes borxh të 700 milionë eurove. Ndërsa deklaratave të mëparshme, edhe të numrit 2 të demokratëve për vjedhjet në OSHEE janë hedhur poshtë pas vendimit për të abstenuar për këtë projektligj.
