Kryetari i Partisë Demokratike, Lulzim Basha ka deklaruar se përballja me paraardhësin e tij, Sali Berisha nuk mund të evitohet, teksa ka theksuar se ndihet përgjegjës për fatin e demokratëve. Basha nënvizoi se interesat e tij dhe të Berishës janë të ndryshëm, ku Berisha lufton për interesat e tij personal, ndërsa ai për ato të PD-së.
“Ndihem më shumë përgjegjës për fatet e PD-së, demokratëve dhe për fatet e shqiptarëve. Ndërsa ajo që ju e quani përballje me Berishën është e paevitueshme. E rëndësishme është që nga kjo përballje secili ti dije motivet e palëve. Interesat e mia janë të demokratëve përballë interesave vetjake të Sali Berishës”- tha ai.
Basha argumentoi se vendimi për përjashtimin e Berishës nuk mund të shmangej për dy arsye, etike dhe politike.
“Ishte një detyrim, i pashmangshëm. Për dy arsye: Etike dhe politike. Arsyeja etike e cila duhej të dominonte është standardi i vendosur nga PD dhe nga unë me propozimin për vettingun e politikanëve kemi argumentuar se shpallja non grata është e mjaftueshme mbajtja e një posti. Përtej këtij standardi një arsye tjetër ka të bëjë me përgjegjësinë e kryetarit të partisë. Përgjegjësia e kryetarit është vendosja në prioritet e interesave të demokratëve”- tha ai.
Lidhur me vendimin e Berishës për të mos pranuar këtë vendim të Bashës për përjashtimin e tij nga PD-ja, pas shpalljes ‘non-grata’ dhe nisjen e “foltores”, kreu aktual i PD-së u shpreh se ligjërimi i mbajtur nga paraardhësi i tij mbart të njëjtat tipare të komunizmit, stigmatizimin e atij që nuk mendon si ti.
“Ajo që unë konstatoj është që vendimi është marrë me 9 shtator dhe pasa atij vendimi ka ndërmarrë një tur takimesh ka përdorur një ligjërim e cila për fat të keq rikujton pjesë të trashëgimisë së tij politike me dritëhijet e tij, me nje fjalor që mbart të njëjtat tipare të komunizmit, stigmatizimin e atij që nuk mendon si ti.”
Basha shtoi se Berisha po keqpërdor demokratët duke i manipuluar në favor të interesave të tij personal, teksa theksoi se ai u vetpërjashtua nga PD duke i rënë me shkelm vlerave që mbajnë bashkë demokratët.
“ Ajo që ndodhi nga 9 shtatori është keqpërdorimi maksimal i demokratëve, manipulimi për interesa vetjake të një njeriu. Ai mund ta kishte ndërmarrë një tur se vendimi i tij non grata është i padrejtë, se respekton demokratët dhe nuk do u bëhet barrë grupit parlamentar të tij por nuk duhej të manipulonte gjendjen e rëndë në të cilën ndodhen demokratët sot për interesat e tij. Prej ditës time në parë në PD kam thënë se nuk jam i kulturës së përjashtimit, por nuk mund të ndaloj dikë të vetëpërjashtohet duke u rënë me shkelm vlerave që mbajnë bashkë demokratët”- tha ai.
Discussion about this post