Partia Demokratike e drejtuar nga Lulzim Basha, e cila në bazë të vendimit të Kolegjit Zgjedhor, ka të drejtën e propozimit të dy komisionerëve për çdo qendër votimi në Bashkinë e Kukësit, duket se është kthyer në një pengesë për mbarëvajtjen e procesit që do të zhvillohet në 24 shtator.
Kjo për faktin se nga 148 komisionerë që duhet të kishte depozituar në KQZ për 74 qendrat e votimit, ka paraqitur emrat për 20 qendra.
Ndërkohë që ka propozuar dy anëtarët e saj në KZAZ e Kukësit.
Shqetësimi është ngritur gjatë mbledhjes së KQZ ku janë testuar pajisjet teknologjike që do të përdoren për zgjedhjet e pjesshme të 24 shtatorit në Bashkinë Kukës.
Në Kukës do të aplikohet identifikimi elektronik i votuesve, ashtu sikundër u veprua edhe në 14 maj, ndërsa është parashikuar një numër më i madh aparaturash se sa numri i qendrave të votimit për të shmangur çdo lloj konfuzioni.
Në zgjedhjet e 24 shtatorit përballë njëri tjetrit garojnë kandidatët e mbështetur nga PS dhe “Bashkë Fitojmë”, ndërkohë që PD zyrtare e drejtuar nga Lulzim Basha nuk ka nxjerrë kandidat. Gjithsesi partia e Bashës, referuar vendimit të Kolegjit Zgjedhor ka të drejtën e dy anëtarëve në KZAZ, sipas partia më e madhe e opozitës, si dhe dy anëtarëve për çdo qendër votimi. Ndërkohë që koalicioni Bashkë Fitojmë do të propozojë 1 anëtar për qendrat e votimit.
Discussion about this post