Ish-kreu demokrat Lulzim Basha, në vijim të turit të takimeve që po zhvillon në qytete të ndryshme të vendit, tha se demokratët nuk do të jenë peng i halleve të politikanëve të korruptuar dhe inkriminuar.
Nga Lezha ku takoi mbështetës të tij, Basha tha se do të bëjmë ndarjen në mënyrë të qartë dhe përfundimtare të së ardhmes nga e shkuara, duke shtuar se askush nuk do të mund ta ndalë këtë sado të përpiqet.
“Partia Demokratike është partia e parë opozitare, partia e shpresës së parë dhe ka për mision të kthehet një orë e më parë në detyrën që i ka ngarkuar historia dhe shqiptarët, në një aleancë të pacekshme me SHBA, Britaninë e Madhe dhe BE.
Ata që shkelin ligjin dhe abuzojnë me pushtetin duhet të mbahen përgjegjës para drejtësisë. Vetting-u i politikanëve është kontributi më i rëndësishëm që gjithkush që e konsideron veten të pastër mund të japë për një politikë të pakorruptuar dhe inkriminuar, që i jep fund modelit të përbaltjes.
Përballja pa kompromis me korrupsionin, pastrimi i politikës, dhënia fuqi qytetarëve të zgjedhin me votë përfaqësuesit e tyre në Parlament, vota e diasporës janë jetike në rrugën që kemi nisur për çlirimin e politikës dhe ekonomisë”, tha Basha.
Ai u shpreh se do të ndërtojmë një aleancë gjithëpërfshirëse me të gjithë faktorët shoqërorë, për të çliruar sistemin politik dhe atë ekonomik përmes:
✅ Listave të hapura;
✅ Vetting-ut në politikë;
✅ Kufizimit të mandateve;
✅ Votës së diasporës;
✅ Zgjedhjes së Presidentit nga populli.
“Ne do të ndërtojmë një parti moderne, që reflekton kërkesat e kohës, shoqërisë dhe nevojave të saj, që respekton kontributet, garanton karrierën, forcon meritokracinë, e hapur ndaj të rinjve dhe mendimeve të reja. Ky është modeli që duhet t’u japim shqiptarëve, si shembull i ndryshimit që po ndërmarrim për Shqipërinë”, tha Basha.
Discussion about this post