Kreu i PD Lulzim Basha u shpreh se do të ishte kriminale nga ana e tij nëse nuk do të përjashtonte Berishën nga Partia Demokratike, pas shpalljes së tij “non grata”. Sipas tij PD-ja që në themelimin e saj ka qenë një parti antikomuniste dhe pro demokrate, ndaj përbërja dhe statuti i kësaj partie e detyrojnë atë që të merr të tilla vendime, duke garantuar mbrojtjen e vlerave të kësaj force politike. Ai u shpreh se ishte përpara një dileme mes interesit të përbashkët të PD-së apo atij personal të Berishës, gjithashtu sipas tij Berisha e kishte paralajmëruar vet këtë vendim.
“ I vendosur përpara një dileme, fati personal i Sali Berishës, apo interesat e demokratëve, siç u bë publikisht e njohur nga qëndrimi i Shteteve të Bashkuara pas shpalljes së tij non grata, do të ishte jo vetëm neglizhente, e pafalshme, por kriminale nga ana ime apo çdokujt që do të ishte në vendin tim, të mos zgjidhja anën e demokratëve, dhe këtë kam bërë. E kundërta do të kishte qenë kriminale, madje t’iu them dhe këtë. Ky ishte një vendim që Sali Berisha pakashum e paralajmëroi vet. Në korrik ai tha që unë nuk do ta përfshij Partinë Demokratike, as grupin parlamentar. Bëri krejtësisht të kundërtën.”
Ai shtoi se Shqipëria dhe PD-ja kanë pranuar që SHBA-ja të jetë një juri e demokracisë dhe të shtetit të së drejtës, teksa thekson që është i njëjti aleat që ka shpallur “non grata” dhe Vangjush Dakon apo Tom Doshin.
“Një person i shpallur non grata nga SHBA-të, që për demokratët, për Partinë Demokratike, gjë tjetër se ju mund të keni mendime të ndryshme, po për demokratët dhe për Partinë Demokratike, ne kemi pranuar Departamentin e Shtetit, si një juri të demokracisë dhe të shtetit tonë të së drejtës. Ne citojmë çdo mars kur del raporti i të drejtave të njeriut, citojmë edhe marsin e këtij viti dhe marsin e këtij viti Departamenti i Shtetit ka shkruajtur që Shqipëria është vendi më i korruptuar në Ballkan. Është ky Departamenti i Shtetit që ka shpallur non grata Dakon dhe Doshin me sa dimë ne, se ka dhe shpallje të cilat nuk janë bërë publike.”
Discussion about this post