Basha flet për “non-gratën” e Berishës pas takimit me Escobar: Do të shkoj në SHBA

Pas takimit me zyrtarin e lartë amerikan, Gabriel Escobar, kryedemokrati Lulzim Basha deklaroi se temë diskutimi në selinë blu ka qenë edhe vendimi i SHBA për të shpallur non grata ish-kryeministrin Sali Berisha.

Basha tha para mediave se për vendimet dhe qëndrimet e DASH do të flasë drejtpërdrejtë Escobar.

“Pa diskutim që çështja e ndëshkueshmërisë, sikundër politikat e sanksioneve non grata, ishin pjesë e diskutimit. Sa i përket çështjeve që i takojnë vendimeve të DASH, jam i bindur se do të dëgjoni drejtpërdrejt nga Escobar për qëndrimet e DASH. Është një ftesë e përsëritur dhe po planifikoj një vizitë në Uashington, në mënyrë që të shtyjmë përpara objektivat e PD, por edhe daljen nga kjo gjendje dëshpërimi, plogështie që ka shkaktuar 25 prilli, dhe ecjen e Shqipërisë përpara me reforma, zgjedhje të lira e të ndershme”, tha Basha.

Ndër të tjera, ai tha se në takim është folur dhe për aktualitetin shqiptar dhe Kosovën duke theksuar se ia kishte bërë të qartë që integriteti i saj territorial nuk mund të cënohet.