Kryetari i Partisë Demokratike Lulzim Basha ka shprehur edhe njëherë bindjen se është në avantazh sa i takon “betejës” me Berishën, ndërsa për këtë të fundit ka shtuar se mbajtja e tij në PD ka qenë humbje për ta.
Ndër të tjera kryedemokrati deklaroi në emisionin “Open” se mban përgjegjësi për faktin që lejoi ish-kryeministrin të qëndronte në parti edhe pas dorëheqjes nga posti i kryetarit në vitin 2013.
“Një nga qëllimet e Kuvendit tonë është ndarja e kultit të individit. Ka vazhduar edhe pas dorëheqjes së Berishës. Demokratët e kanë paguar heshturazi koston e mbajtjes së tij në parti. Pjesën më të madhe të përgjegjësisë e mbaj unë. Berisha tha: Lamtumirë!’, por nuk iku me akte nga partia. Partia Demokratike ka bashkëjetuar me koston e dualizmit dhe unë kam përgjegjësinë time”, ka deklaruar ai.
Më tej, kreu i demokratëve tregoi se gjatë fushatës elektorale të 25 prillit qytetarë të shumtë i kanë treguar se PD-ja nuk mund të vinte në pushtet duke patur Berishën dhe presidentin Ilir Meta si mbështetje.
“Kemi hedhur gurët e rëndë mbi shpatull. Kanë qenë shumë që më kanë thënë që jeni shumë të mirë, por me Sali Berishën dhe Ilir Metën në krah nuk fitohet. Kemi paguar faturën”, ka deklaruar Basha.
Discussion about this post