Basha: Hetim të thelluar parlamentar për investitorët strategjikë

“Do të kërkojmë hetim të thelluar parlamentar për investitorët strategjikë”, u shpreh Lulzim Basha, që 3 ditë më parë mori drejtimin e PD-së zyrtare.

E ndërsa ka vijuar me një tur takimesh në kuadrin e asaj që e konsideron si riorganizimi i PD-së dhe strukturave të saj, nga Shkodra, Basha tha se jemi të vetëdijshëm për vlerat dhe standartet që na bashkojnë për të ndërtuar alternativën më të mirë të Partisë Demokratike për shqiptarët.

Basha tha se lufta kundër korrupsionit është sot një nga prioritetet tona, duke shtuar se një rast i tillë është ligji për investitorët strategjikë, i cili është përdorur për të shpërblyer miqtë e kryeministrit me pasuritë tona publike.

“Ne do kërkojmë një hetim të thelluar parlamentar të investitorëve strategjikë, atyre që përfitojnë dhe bashkëndajnë me qeveritarët e korruptuar pasuritë e këtij vendi, ndërsa shqiptarët mbeten ndër popujt më të varfër dhe më të keqpaguar. Askush nuk do të jetë mbi ligjin!”, tha Basha.