Në një takim me të rinjtë në Durrës, ku ka prezantuar kandidatin Luan Hoti për kryetar bashkie, kreu i PD, Lulzim Basha foli për misionin e tij për t’i hapur rrugë të rinjve që të marrin në dorë fatet e vendit.
Gjatë fjalës së tij, Basha u ndal edhe te projekti i portit të Durrësit, për të cilin ish-kryeministri Berisha e akuzon se po bashkëpunon me Ramën. Basha tha se nuk ka ndërmend të merret, ndërsa e akuzon këtë të fundit se gjatë natës takohet me ish-kreun e Bashkisë Durrës, Vangjush Dakon.
“Gënjeshtra tjetër është ajo që po bëhet me portin e Durrësit. Edhe këtë do ta çmontojmë. 6 vjet më parë nisëm denoncimet për inceneratorët, sot po dridhen. Aferën e portit të Durrësit që e kemi denoncuar do ta çojmë deri në fund. Nuk do ta lëmë Durrësin pa zhvillim. Dhënia e portit të Durrësit pa garë një arabi që në fakt u shërben disa oligarkëve. Pala tjetër thotë se ky është projekti Rama-Basha ndërkohë që natën takohet me Dakon. Unë nuk kam ndërmend që të merren me baltën që hedh modeli i vjetër. Ne do merremi me fakte. Pa transparencë nuk ka zhvillim. Do tua çajmë siç ua çamë kasafortën e inceneratorëve. Modeli i vjetër do të vazhdojë të dominojë edhe 30 vjet të tjera. Duan edhe 30 vjet të tjera ta qeverisin kështu Shqipërinë”, deklaroi Basha.
Discussion about this post