Mbledhja e sotme e Kryesisë së PD është shoqëruar me debate të forta midis kreut demokrat Lulzim Basha dhe një ndër përkrahësit më të madh të Berishës, Flamur Noka.
Pasi Noka e akuzoi se i nguli thikë pas shpine Berishës, mësohet se Basha i është kundërpërgjigjur duke thënë se informacionet që di ai dhe Berisha në lidhje me vendimin e DASH, nuk do t’i marrin vesh kurrë të tjerët.
Basha ka përsëritur dhe njëherë se vendimi nuk ka kthim pas, teksa shtoi se Berisha nuk është përjashtuar përfundimisht.
“Vendimi për Sali Berishën nuk ka më kthim pas. Pastaj ka një keq lexim që bëhet ose interpretohet në media. Doktori nuk është përjashtuar përfundimisht. Ndaj tij janë thënë fjalët më të mira. Por siç ka deklaruar edhe vetë ai, do të ndjek procesin gjyqësor. Dhe derisa e vërteta të dal në shesh do të qëndrojë jashtë grupit. Ai nuk është përjashtuar as nga strukturat që të ishte nevoja për mbledhjen e organeve të PD”.
Basha po ashtu ia ka bërë të qartë Nokës se nuk do të lejojë mbledhjen e Këshillit Kombëtar, duke theksuar se nuk do të ketë asnjë grupim anti-amerikan në PD.
“Nuk ka për të pasur asnjë mbledhje të Kuvendit Kombëtar, e asnjë mbledhje të ndonjë forumi tjetër anti-amerikan. Kërkesa për doktorin nuk ka ardhur nga zyrtarë të nivelit të tretë apo të rangut të ulët. Ka ardhur nga kupola e shtetit amerikan. Informacionet i di unë, siç i di shumë mirë edhe doktori dhe që ju skeni për ti marr vesh kurrë”.
Nga ana tjetër, mësohet se Lulzim Basha është nisur pas takimit për të takuar kryetarët e degëve në qarkun e Fierit. Keto takime te Bashës me krerët e degëve vijnë një ditë para takimit që ka paralajmëruar Berisha në këtë qytet në kuadër të iniciativës për rikthimin e sovranitetit të PD.
