Lulzim Basha, i cili prej disa muajsh ka marrë drejtimin e asaj që njihet si PD zyrtare apo e vulës, ka zhvilluar një takim me mbështetësit e tij në Tiranë, ku u shpreh se gjatë kësaj periudhe është kryer ringritja e partisë që drejton.
Basha tha se betejat nuk fitohen nga më të fortët, por nga më të vendosurit dhe sipas tij PD dhe demokratët janë më të vendosur se kurrë.
Basha është shprehur se ata sulmohen pasi nuk kanë pranuar të futen në vathin e atyre që ditën bëjnë teatër gjoja të ndeshjeve politike dhe natën numërojnë paratë.
“Sulmohemi sepse ne nuk pranojmë të futemi në vathin e autokracisë politikë, oligarkisë ekonomike qe sot operohet nga të njëjta duar, që ditën bëjnë teatrin e gjoja ndeshjen politike dhe natën numërojnë paratë e pasuritë që ju grabisin së bashku shqiptarëve”, tha Basha.
Ai shtoi se drejton një parti jashtë sistemit të zullumit.
“Jemi e vetmja parti politike jashtë sistemi të zullumit. Do të qëndrojmë jashtë sistemit të zullumit, do ta mundim zullumin dhe do t’ja japim shqiptarëve shpresën që meritojnë”, shtoi ai
Në vijim, Basha u shpreh se lufta mes Rusisë dhe Ukrainës, është lufta mes autokracisë dhe demokracisë.
“Kjo luftë po zhvillohet kudo, jo me armë, por me armë të ftohta në cdo shesh, rrugë e qytete, në veçanti në Shqipëri.
Është beteja e një pakice që do të mbajë këtë gjendje. Të mbajë kontrollin në një grusht njerëzish, që menaxhojnë vendin.
Synimi është i qartë, fatet e këtij vendi t’i kontrollojë një pakicë obsolute. Kjo është autokracia, sundimi i njerëzve që e kanë marrë pushtetin dhe e mbajnë atë për veten e tyre dhe klientët e tyre.
Kjo është më afër asaj që lamë pas 34 vite më parë. Një diktaturë e një tipi të ri. Kështu e duan Shqipërinë, pa drejtësi, pa prona e pa kujtesë historike. E deshën Shqipërinë edhe pa PD, por nuk ia arritën këtë falë jush”, tha Basha.
Discussion about this post