Lulzim Basha, i cili drejton PD-në zyrtare, vijon takimet me qytetarë në qarqe të ndryshme të vendit, në kuadër të një turi për riorganizimin e strukturave të partisë që ka marrë përsipër të drejtojë prej rreth 3 muajsh.
Në një takim në Lushnje, Basha u shpreh se projekti i PD-së është për të qenë në shërbim të njerëzve, për një politikë në shërbim të tyre, që dëgjon zërin e qytetarëve, që punon për të rritur mirqënien dhe le pas telenovelat e politikanëve.
“Fola me shumë qytetarë dhe biznese të vogla në Lushnje për taksat e larta dhe kostot e rritura që kanë vendosur në vështirësi edhe prodhuesit edhe konsumatorët. Për korrupsionin që cënon mirëqenien dhe për largimin masiv të shqiptarëve në emigracion, sepse fatkeqësisht Lushnja , ashtu si dhe qytetet e tjera, nuk ofron mundësi për të ndërtuar të ardhmen dhe një jetë më të mirë.
Përpara tyre dhe gjithë qytetarëve shtrohet çdo ditë e më shumë pyetja, nëse do të vazhdojmë kështu apo do të punojmë të gjithë bashkë për një ndryshim të vërtetë. Për një politikë në shërbim të tyre, që dëgjon zërin e qytetarëve, që punon për të rritur mirëqenien dhe le pas telenovelat e politikanëve.
Qëllimi i këtyre telenovelave është që të fshehë klientelizmin dhe korrupsionin e politikës pas një shfaqje shterpë që nuk jep asgjë për njerëzit. Partia Demokratike është e vendosur të punojë bashkë me çdo shqiptar për të mundësuar këtë ndryshim, për të ndërtuar së bashku një të ardhme më të mirë”, tha ai.
Discussion about this post