Kreu i opozitës, Lulzim Basha ka reaguar për herë të parë pas dorëzimit të 4200 firmave për mbledhjen e Kuvendit Kombëtar të PD.
Jashtë selisë blu, Basha është shprehur se ish-kryeministri Berisha është tallur me demokratët, ndërsa hodhi akuza se po bashkëpunon me qeverinë për të kryer një puç në PD.
“Shpresa e demokratëve nuk do të shkelet me këmbë. Kemi një regjim përballë dhe po mbështetet në një trekëndësh. Regjimi është bërë pjesë e përpjekjes për një puç. Kemi informacione se Berisha ka bashkëpunuar me regjimin për puç në PD. Kam vetëm një thirrje për Sali Berishën: Boll harxhove kohën dhe energjitë e demokratëve. Boll ndihmove Edi Ramën. Berisha e ka një betejë personale dhe jo për PD. Berisha ka bërë një tallje të madhe me demokratët përgjatë këtyre muajve. Kemi informacione që Berisha ka bashkëpunuar me regjimin për të kryer një puç në PD”, është shprehur Basha.
I pyetur se nëse firmat e duhura do të dorëzohen, a do të shkojnë në Kuvend, Basha tha se përgjigjja është statuti.
“Përgjigjja e statutit është fare e qartë. Ka një proces shumë të qartë, ua ka shpjeguar në detaje sekretari i përgjithshëm ndaj ju ftoj t’i referoheni që të mos bëhemi përsëritës, gjithçka që sekretari i përgjithshëm ju ka thënë dje. Ndërsa qëndrimin tim si kryetar besoj e keni të qartë, është pa ekuivok”, tha Basha.
Ditën e mërkurë, se selinë e PD, u dorëzuan 4200 firmat e delegatëve të grumbulluara nga “foltorja” e ish-kryeministrit Sali Berisha, me kërkesën për mbledhjen e Kuvendit Kombëtar të PD-së. Të pranishëm në dorëzimin e firmave ishin emra të PD-së si, Klevis Balliu, Albana Vokshi, Flamur Noka, Aldo Bumçi dhe Edmond Spaho, të cilët janë rreshtuar pranë Sali Berishës që në nisje të kësaj nisme.
Firmat u dorëzuar në zyrën e Edi Palokës, në funksionin e kryetarit të Këshillit Kombëtar të Partisë Demokratike. Kuvendi Kombëtar pritet të mbahet më 11 dhjetor, që konsiston në ditën e themelimit të kësaj force politike.
Discussion about this post