Kryetari i PD, Luzim Basha po zhvillon një takim me demokratët e degës numër 2 në Tiranë, ku ndër të tjera ka komentuar edhe lëvizjen e ish-kryeministrit Berisha dhe sëfundmi edhe rreshtimin krah tij të presidentit Meta.
Ndërsa futi në të njëjtin rreth dhe kryeministrin Rama, Basha u shpreh se të tre flasin të njëjtën gjuhë, dhe se halli i vetëm i tyre është të shkatërrojnë PD dhe të mbajnë peng Shqipërinë.
“Në qoftë se kemi mësuar diçka në këto muaj, të gjithë të tjerët janë bërë bashkë me Edi Ramën. I patë mbrëmë si flasin njësoj, mbajnë të njëjtat qëndrime, përdorin të njëjtat terma, kanë të njëjtën gjuhë, i bashkon i njëjti hall, që nuk është halli i shqiptarëve, është halli i karrigeve të tyre personale, i fatit të tyre personal. Në raport me atë që i kanë hyrë në hak shqiptarëve. Njëri koordinon sulmin kundër Partisë Demokratike, tjetri e financon Foltoren dhe flet me gjuhën e Foltores edhe në Parlament, edhe në qeveri, edhe në ekran, tjetri e zbaton planin për të shkatërruar Partinë Demokratike. Edhe ata janë bashkë, mos keni iluzione. Hiqni çdo iluzion. Janë bashkë, Edi Rama, Sali Berisha, Ilir Meta, janë të tre bashkë, janë bashkë prej hallit që i lidh bashkë, dhe janë bashkë për të shkatërruar Partinë Demokratike. E pra, së pari do të thotë të shkëputemi nga 30 vite tranzicion. Nga kalorësit e apokalipsit. Nga ajo treshe që sot është bërë bashkë për të mbajtur peng Shqipërinë, për ta mbajtur Shqipërinë pronë dhe plaçkë të vetën dhe për të cilën i vërtiten Partisë Demokratike me këtë egërsi, sepse është pengesa e vetme”, u shpreh Basha.
Kujtojmë se kryedemokrati ka nisur një takim me demokratët për të rritur popullaritetin në bazë, ndërsa vetëm disa ditë më parë PD u regjistrua zyrtarisht në zgjedhjet lokale të 6 marsit.
Discussion about this post