Kryetari i Partisë Demokratike, Lulzim Basha ka zhvilluar takime sot me demokratët e Kavajës, Rrogozhinës dhe të dy njësive 15-16.
Në komunikimin e tij me demokratët, Basha u shpreh se ishin të vendosur që të bindnin vendet aleate të Shqipërisë, për masakren elektorale, për të hartuar më pas një platformë për t’i rikthyer legjitimitetin dhe demokracinë Shqipërisë.
Në fjalën e tij, numri një i PD-së nuk i ka kursyer as ofendimet ndaj kundërshtarëve të opozitës, duke i cilësuar si të lidhur me botën e krimit dhe analfabetë.
“Ata e kuptuan se beteja nuk bëhej për karrigen time dhe karriget tuaja, ata e besuan dhe e besojnë se përballë një pakice harbutësh të korruptuar të cilët kishin dhe kanë për qëllim ta mbajnë vendin peng për xhepat e tyre kishte vetëm një alternativë: familja jonë politike. E vetmja familje vlerash. Ata me kriminelë e analfabete si Aqif Rakipi me shokë e ne me njerëz të vlerave, kulturës, intelektualë. Edhe në këtë fushatë kështu dolëm, ata me krimin në krah, ne me njerëz të vlerave, me intelektualë të spikatur. Mos i ulni kokat, kokat do t’ua ulim hajdutëve dhe kriminelëve. Ta çmontojmë këtë regjim duke bërë të mundur që atë që përkohësisht e ndalën shpresën dhe aspiratën, dëshirën dhe vullnetin e shumicës dërrmuese të shqiptarëve për ndryshim ta bëjmë realitet. Sepse me të vërtetë me 25 prill ka rënë demokracia, por nuk kanë rënë shqiptarët, nuk ka rënë Partia Demokratike,“-tha Basha.
