Ish-kryedemokrati Sali Berisha ka reaguar ndaj lëvizjeve të fundit në Partinë Demokratike, ku mëngjesin e sotëm në xhamat e përparmë të derës kryesore të selisë blu u veshën me letër ngjitëse që ka të printuar logon dhe simbolet e partisë. Berisha ka akuzuar kreun e PD-së Lulzim Basha se po tentojë të privatizojë këtë forcë politike, duke e shndërruar në bunkier të vetmisë së tij. Ai i ka cilësuar këto ndryshime si akte turpi dhe paniku nga ana e Bashës.
“Deputeti Lulzim Brava e nisi Vitin e Ri me avazin e vjetër të izolimit. Pasi izoloi veten nga 4446 delegatë dhe 43 385 anëtarë që firmosen shkarkimin e tij ai ka vendosur në prag të protestës paqësore të demokratëve ta kthejë shtëpinë e tyre ne bunkerin e vetmisë dhe pazareve te tij. Kështu, në një akt turpi dhe paniku të denjë vetëm për një apartcik të marre peng ai ndërron brava dhe po vendos dyer te blinduara për të shndërruar shtëpinë e demokratëve, selinë e Partisë Demokratike, në bunkerin e tij privat”, thuhet në deklaratë.
Berisha shtoi se përtej këtyre ndryshimeve ai dhe Komisioni i Rithemelimit të PD-së, i krijuar nga vet ai, nuk do të mposhten nga dyert dhe bravat.
“Me ketë rast i kujtojmë Lulzim Bravës që mendon se me dyer dhe brava do të mposhtë shumicën dhe pluralizmin në Shqipëri se ata që shembën regjimin më gjakatar ne ‘90 nuk do të lejojnë kurrë asnjë derë bravë, hekur apo shul të mbaje peng vullnetin e tyre të shprehur përmes votës së lire. Partia Demokratike ka lindur si shtëpi e lirisë dhe e tille do të vijojë të mbetet, kurse Lulzim Pengu se bashku me pengmarrësin e tij do kenë fatin e atyre qe bunkerizuan Shqipërinë”, thuhet në deklaratë.
Berisha i ka lënë afat Lulzim Bashës që t’i lirojë zyrën e kryetarit të PD-së deri në datën 5 janar me argumentin se Kuvendi i 11 dhjetorit e ka shkarkuar me firmën e 4446 delegatëve.
Discussion about this post