Teksa ditën e nesërme pritet që Basha të marrë vendimin përfundimtar, deputetët e Partisë Demokratike kanë vazhduar presionin publik ndaj tij. Edhe deputeti njëherësh anëtarë i Komisionit të Rithemelimit, Belind Këlliçi u shpreh se Basha po gënjen deputetët për të thënë se PPE kanë dërguar në Tiranë një person të deleguar për dialog mes palëve.
Ai shprehet se një gjë e tillë nuk është e vërtetë dhe se kjo është një çështje e brendshme e PD-së, pasi ka një debat shterues se cila është shumica e vërtetë në PD tashmë pas 6 marsit.
“Basha po gënjen deputetët sërish për të thënë se PPE kanë dërguar në Tiranë një person të deleguar nga ata që të gjejnë një rrugë të përbashkët dhe Berisha të tërhiqet për të fituar më shumë kohë. Ky është një lajm i rremë. Po ka ardhur një personalitet evropian që është në pension politik, por që ka ardhur i mandatuar vetëm nga Basha, dhe nuk ka lidhje me PPE. Kjo është një çështje e brendshme e PD-së, pasi ka një debat shterues se cila është shumica e vërtetë në PD tashmë. Ky debat ka marrë fund në 6 mars” – u shpreh Këlliçi.
Ai gjithashtu tha se nga sondazhet e kësaj radhe, Basha rezulton 3-4% nga 13% që rezultonte në 6 mars. Sipas tij, Basha i përket së shkuarës dhe i takon tashmë PD-së që të mblidhet dhe të rigrupohet dhe të bashkohen të dyja kampet në një grupim të vetëm.
“Nga sondazhet e kësaj jave, Basha rezulton 3-4% nga 13% që rezultonte në 6 mars. Javën tjetër apo deri në fund të muajit do të jetë më pak se 1%. Basha i përket së shkuarës dhe i takon tashmë PD-së që të mblidhet dhe të rigrupohet dhe të bashkohen të dyja kampet në një grupim të vetëm. Unë e shoh të vështirë që Basha të dalë nga ky realitet fals ku është futur. Mua më vjen keq që ndodhet në këtë gjendje sepse i kam dedikuar një dekadë. Basha i përket së shkuarës tashmë” – u shpreh Këlliçi.
Discussion about this post