Në fjalën e tij në Parlament, kreu i opozitës Lulzim Basha ka thënë se demokracia shqiptare ka vdekur që në shtyllat e saj kryesore siç janë zgjedhjet e lira.
“Demokracia shqiptare nuk është në krizë, ajo ka vdekur! Ka vdekur në shtyllat e saj kryesore, në themelin e saj që janë zgjedhjet e lira. Nuk vdiq për shkaqe natyrore, paçka se sëmundja e saj ishte e rëndë dhe e gjatë” – është shprehur Basha.
Kreu i PD u ndal edhe tek projekti “Open Balkan”, i cili e ka quajtur si një iniciativë e Serbisë e cila përbuz Procesin e Berlinit. Sipas Bashës ky projekt qëndron mbi interesat e liderëve iniciues që u vihen në shërbim korrupsionit dhe krimit të organizuar.
“ Juve nuk ju intereson aspak procesi dhe rezultati i bashkëpunimit rajonal por vetëm kapardisja si udhëheqës rajonalë para popujve që i keni lënë në baltë prej korrupsionit dhe lidhjeve tuaja me krimin e organizuar. E udhës për Shqipërinë do të ishte të fokusonte të gjitha energjitë te Procesi i Berlinit, te thithja e fondeve të vëna në dispozicion – por këtu qëndron problemi se nuk i vidhni dot – dhe te mekanizmat për të sjellë më afër vendet e rajonit e për t’i dhënë Kosovës vendin që i takon, si shtet i barabartë mes shteteve te rajonit, në çdo marrëveshje e dokument. Bashkëpunimi rajonal nuk mundet kurrë të nisë nga Novi Sadi, por nga Mitrovica, shqetësimi ynë duhet të jenë shqiptarët e Luginës së Preshevës” – tha Basha.
Basha gjithashtu tha se në këtë procese Shqipëria ka vetëm një detyrë, të mbështesë Kosovën, sepse për Shqipërinë nuk mund të jetë e mirë ajo që nuk është e mirë për Kosovën.
