Çmimi i naftës ka shënuar një tjetër rritje të shtunën duke arritur nivele rekord të papara ndonjëherë në tregun vendas. Në pikat kryesore të tregtimit me pakicë si Gega, Kastrati dhe Alpet, nafta po tregtohet me 230 lekë për litër. Kjo është rritja e tretë brenda dy ditëve.
Për këtë situatë ka reaguar dhe kreu i Partisë Demokratike i cili i është drejtuar me një thirrje qeverisë që të marrë masa për uljen e çmimit të naftës.
Me anë të një videomesazhi nga një pikë karburanti, Basha i kërkoi qeverisë që të heqë taksën “Rama” nga çmimi dhe t’ju vijë në ndihmë qytetarëve dhe familjeve shqiptare .
“ Është detyra e qeverisë t’ju vijë në ndihmë njerëzve dhe bizneseve në këto kohë të vështira dhe qeveria shqiptare i ka të gjitha mundësitë duke ulur taksën që t’ju vijë në ndihmë njerëzve në nevojë në mënyrë që ju të paguani më pak për karburantin, të paguani më pak për mallrat e tjera dhe shërbimet e tjera bazë, çmimi i të cilave ndikohet drejtpërdrejt dhe rritet nga çmimi i karburantit”, ka thënë ndër të tjerash Basha.
Ai ka kërkuar që çmimi i karburantit të mbahet nën kontroll përmes uljes së taksave që ndikojnë tek çmimet.
Discussion about this post