Kryetarja e Kuvendit Lindita Nikolla bëri të ditur sot se ka marrë një njoftim, sipas të cilit Lulzim Basha është kryetar i Grupit Parlamentar të PD-së.
Momenti kur Nikolla bëri këtë lajmërim është shoqëruar me të qeshura në sallën e Kuvendit nga deputetët, kryesisht ata të PD-së, ndërsa Basha qëndronte serioz, pavarësisht se shumë prej ligjvënësve që e rrethonin nuk po arrinin të ruanin seriozitetin.
“Sot në orën 9 kam marr një njoftim nga PD e cila më drejtohet që në zbatim të rregullores së parlamentit, më vënë në dijeni se kryetari i grupit është Basha”, tha Nikolla.
Ndërkohë, Gazment Bardhi duke reaguar pas këtij njoftimi tha se kryetarin e grupit të PD nuk mund ta zgjedhë partia Socialiste.
“Ju mund të talleni me qytetarët por ta harroni kur kryetarin e grupit të PD ta zgjedhë partia Socialiste. Ti dhe Rama t’i bëni llogaritë mirë. Nuk ka ndodhur ndonjëherë në parlament të jenë lexuar njoftimet e partive politike. Ato ta kryejnë veprimtarinë e tyre jashtë kësaj salle. Janë deputetët që vendosin kush është kryetari i grupit parlamentar. Ju lutem mos provokoni deputetët e opozitës. Ky është paralajmërim i qetë dhe qytetarë. Kuvendi ka grupet parlamentar,e Edi dhe Veliaj nuk e caktojnë dot kryetarin e grupit të Partisë Demokratike”, u shpreh Bardhi.
Në statutin e ri të PD-së u caktua që Kryetari i PD-së, në rastin konkret Lulzim Basha, të ishte dhe kreu i grupit parlamentar.
Ndërkohë ai tha sot se këtë detyrë do ia delegojë një nga nënkryetarëve të PD-së.
Discussion about this post