Basha: Nuk ka më kohë, 14 maji është arrest kardiak për demokracinë

Nga Berati ku zhvilloi takimin e rradhës me të rinjtë dhe të rejat, deputeti Lulzim Basha,  e quajti 14 majin një disfatë për demokracinë.

“Kur e nisa këtë tur takimesh shkaku, brenga e parë ishte ajo që ndodhi më 14 Maji. Nuk ishte e papritur. Por dimensioni i asaj që ndodhi goditi rëndë demokratët dhe qytetarët. Sepse ajo është një brengë, një lëndim që në qytete që ka patur projekte dhe ëndrra për ndryshim, ajo nuk ndodhi. 14 Maji është arrest kardiak për demokracinë”, tha Basha.

Sipas tij, qytetarët hynë në një proces me kokën ulur dhe 87 në 100 votues për herë të parë nuk morën pjesë në votime, në farsën e demokracisë, të shoqëruar me dajre dhe lodra.

“Ndryshe nga Big Brother i prodhuar nga patenta të ndërkombëtare, big brother i Shqipërisë u braktis. 14 maji, numri më i madh i atyre që folën me bojkot janë të rinjtë. Dhe ky është një mesazh i qartë që ju keni dhënë.

A do ta lem politikën të rrjedhë si lumi i Osumit, e të marrë përpara gjithçka përfshirë shpresat dhe dëshirat apo do ti vemë digë dhe ta bëjmë qe ky ujë të punojë për njerëzit, të ndihmojë dhe jo pengojë jetët, të bëhet burim për shpresa.

Duhet të jemi reflektues. Nuk ka ma kohë”, tha Basha.