Deputeti i Partisë Demokratike, Agron Gjekmarkaj, në një intervistë për mediat, ka thënë se PD është në gjendje traumatike dhe më të vështirë se në vitin 1997.
Ai gjithashtu tha se Basha ishte i detyruar ta merrte këtë vendim dhe nuk mund të shndërrohej në një Haxhi Qamil që të thoshte kam Shijakun e Kavajën me vete kundër Amerikës.
“Në PD nuk ka ngazëllim, është ngjarje traumatike, ngjarje më e vështirë se 1997, përjashtimi i Sali Berishës, nga pikëpamja emocionale. Por unë e kam thënë. Gjykimin e ndërtoj mbi ato që di, mbase nuk i di të gjitha. Lulzim Basha ishte i detyruar. Basha nuk mund të shndërrohej në një Haxhi Qamil që të thoshte kam Shijakun e Kavajën me vete kundër Amerikës.
Procedura që ka zgjedhur Basha nuk më bind, nuk është parimore, por ka marrë përgjegjësi. Lulzim Basha nuk kishte zgjedhje tjetër, ishte në rrezik Partia Demokratike. Unë personalisht e kam konsideruar të padrejtë vendimin e Blinken për Berishën, por Basha nuk kishte zgjedhje tjetër. Presioni vinte nga SHBA-ja nga Reeker. Strukturat janë në trishtim të thellë” – tha Agron Gjekmarkaj.
