Lulzim Basha vijon takimet në kuadrin e rikthimit të tij në politikën aktive. Në një takim me demokratët e degës 15 në Tiranë, Basha u shpreh se i takon demokratëve të marrim përsipër barrën e përgjegjësisë për ngritjen e një alternative reformuese. Sipas Bashës kjo alternativë do të garantojë daljen e vendit nga kjo lëngatë dhe të ndërtojmë ura bashkëpunimi me çdo aktor dhe faktor të shoqërisë që pajtohet me nevojën urgjente për ndryshim.
“Rrënimi moral i një pushteti të korruptuar tregon se ky sistem politik është totalisht i kalbur, nuk mund të qëndroj më në këmbë. Kthimi i pushtetit te njerëzit, përmes ndryshimeve kushtetuese që garantojnë konkurrencën, garën, integritetin e politikanëve dhe funksionarëve publik, është domosdoshmëri për pastrimin e kësaj politike dhe kthimin e besimit të qytetarëve tek institucionet”, shprehet Basha.
Në vijim ai thekson se së bashku me demokratët dhe shqiptarët duhet të bëjmë gjithçka për hapjen e listave, vetting-un e politikanëve, votën e emigrantëve dhe kufizimin e mandateve.
“Partia Demokratike ka lindur si shpresë e shqiptarëve në ditët me të vështira të saj, edhe sot kjo forcë do të ringrihet e do të shndërrohet në shpresën e ndryshimit për Shqipërinë”, shprehet ai.
Discussion about this post