Kryesia e Forumit Rinor të Partisë Demokratike i ka nisur një kërkesë Sekretarit të Përgjithshëm të PD, Gazment Bardhit dhe kreut të Këshillit Kombëtar, Edi Palokës, për thirrjen e një referendumi pas përjashtimit të Sali Berishës nga grupi parlamentar.
Mësohet se, mes firmëtarëve është edhe Glauk Olldashi, djali i të ndjerit Sokol Olldashit. Në kërkesën e formuluar nga FRPD thuhet ndër të tjera se vendimi i kreut demokrat është “në shkelje të plotë të statutit, parimeve, vlerave të PD si dhe rrezikon përçarje të rrezikshme në parti”.
Për këtë arsye, ata kërkojnë thirrjen e referendumit në anëtarësinë e partisë si të vetmen mënyrë për të ruajtur unitetin e PD.
Kujtojmë se, ish-kryeministri Sali Berisha u përjashtua ditën e enjten nga grupi parlamentar i PD, pas vendimit personal të Lulzim Bashës. Vetë Berisha e ka cilësuar si nul vendimin e Bashës, ndërsa u paraqit në Kuvend ku u betua si deputet. Ky vendim i Bashës solli debate të ashpra në PD dhe jashtë saj.
