Pas daljes së kryeministrit Rama reagoi dhe kreu i Partisë Demokratike. Në një mesazh të bërë publik në rrjetet sociale Lulzim Basha shkruan se “Qëllimi i daljes së Edi Ramës para drejtuesve më të lartë të policisë ishte t’u jepte garanci publike kriminelëve se pavarësisht ngjarjeve të fundit, ai e ka në kontroll policinë, se Saimir Tahiri është i sigurt, se interesat e krimit janë të mbrojtura e nuk do të preken.”
Sipas Bashës, sot Edi Rama bëri të qartë se ai ka zgjedhur të sakrifikojë qeverisjen e vendit, integrimin europian të vendit, të ardhmen e vendit për të mbrojtur krimin. Më tej Basha vijon mesazhin e tij: “Në krah të Fatmir Xhafës, Edi Rama u betua se do vendosë shpërblime për kokën e kriminelëve në kërkim. Sa do t’ja vërë çmimin kokës së vëllait të Ministrit të Brendshëm që kërkohet nga policitë e gjysmës së botës për trafik kokaine?” – ngre pyetjet kreu i Partisë Demokrati, i cili mbyll mesazhin duke shkruar se Rama dhe ministrat e tij janë të zhytur në krim dhe të kapur nga krimi dhe se Qeverisja e tij de fakto ka marrë fund.
