Lulzim Basha, gjatë një takimi me gratë dhe vajzat, tha se po rikthehet jo për një platformë, që ka të bëjë me ndryshime kushtetuese, por për një kulturë të re politike.
Basha tha se duhet një reflektim i thellë për atë që ka ndodhur, pasi janë gërryer themelet e shtëpisë sonë.
Ish-kreu i PD tha se sulmi ndaj tij ka të bëjë me frikën e ndryshimit.
“Janë bjerrur standardet tona të moralit”, tha Basha, duke shtuar se edhe ai ka përgjegjësinë e tij.
Ai tha se duhet të kuptojmë dhe reflektojmë ndaj gabimeve tona, nga ato më të hershme deri te këto më të fundit.
“Nuk jam vetëm unë përgjegjës për përçarjen e PD, e cila po shkon drejt qëllimeve të kundërshtarit tonë politik. Nuk duhet të trajtohemi si armiq sepse mendojmë ndryshe. Problemi kryesor i politikës është integriteti i politikanëve”, tha Basha.
Sipas tij, shqiptarët e kanë kuptuar që nëse një Kryeministër nuk do ta lëshojë pushtetin, aktivizon të gjitha mekanizmat dhe nuk e dorëzon pushtetin, por kjo s’ka të bëjë me rotacionin dhe demokracinë.
Basha tha se ky sistem politik është shkërmoqur dhe nuk i shërben askujt tjetër përveç atyre që e ndërtuan.
Discussion about this post