Kryedemokrati Lulzim Basha ka reaguar për herë të parë pas rezultatit negativ në zgjedhjet e pjesshme vendore, ku PD doli forca e tretë politike në shumicën dërrmuese të tyre.
Para gazetarëve, Basha tha se po pret të përfundojë numërimi, ndërsa shtoi humbja erdhi për shkak të pjesëmarrjes së ulët pasi sipas tij, shqiptarët nuk kanë besim tek vota.
“Nuk ka shqiptar që nuk e kupton që gjashtë marsi nuk është një normalitet, por një anormalitet i një anormaliteti. Me një numër rekord të ulët votuesish, shqiptarët treguan se e braktisën zgjedhjet sepse nuk kishin asnjë siguri. Iu mohuan komisionarët. Një pjesë e fajit për mospjesëmarrje në zgjedhje i takon opozitës. Duhet të shkëputemi plotësisht nga e shkuara dhe t’i dëgjojmë dhe përfaqësojmë njerëzit. Jemi në një vend ku janë asgjësuar zgjedhjet. Kanë ndodhur ngjarje që ju i dini më së mirë. Ne do t’i përgjigjemi kësaj përmes një reforme më të thellë. Përshpejtimi i hapave që kemi nisur. Duhet të nxisim mendimin e lirë në parti. Ky nuk është një proces i lehtë. Përballë tani nuk kemi vetëm Ramën, por edhe faktorë të tjerë që kanë zgjedhur të investohen për qëllimet e tyre personale”, tha Basha
Partia Demokratike rezulton forca e tretë në zgjedhjet e djeshme, përveç Rrogozhinës ku PD doli e dyta, ndërsa PS fitoi zgjedhjet.
Discussion about this post