Lulzim Basha, i cili synon kreun e PD-së zyrtare, në një proces që po kontestohet nga shumica e deputetëve që përfshihen në këtë formacion, e ka cilësuar një ditë të veçantë për demokratët 29 korrikun, duke i ftuar të marrin pjesë në votime.
Referuar asaj që është deklaruar, në listat e votuesve janë 25 mijë anëtarë me të drejtë vote, ndërkohë që Lulzim Basha ka votuar te zyra e degës nr.8.
“Dua të shpreh mirënjohjen ndaj mijëra demokratëve që i janë drejtuar kutive të votimit, në këtë ditë me domethënie të veçantë, për nga rrethanat, unike për PD.
Jemi përballur me sfida si askush. Ata mijëra demokratë kanë përballuar sfida të mëdha. Vazhdojnë të qëndrojnë të bashkuar për kauzat dhe vlerat që i bashkojnë ata.
Kjo dalje masive, për të cilën në mëngjes kam marrë qindra mesazhe, shoqëruar me imazhe, për të vendosur që përmes votës së tyre sot, të rinisim një ringritje të PD, jo vetëm për demokratët, por për çdo shqiptar, me shpresën te Shqipëria dhe Zoti.”, tha Basha.
Lulzim Basha synon rikthimin në krye të PD zyrtare, ndërsa përballë tij është Gjergj Hani. Zgjedhjet e sotme nuk njihen nga Këshilli Kombëtar i PD-së, por edhe nga shumica e grupit parlamentar, përfshi edhe Sekretarin e Përgjithshëm Gazment Bardhi.
Një ditë më parë në Gjykatën e Tiranës u depozituan vendimet e miratuara në Këshillin Kombëtar, mbledhje e mbajtur dy ditë më parë, ku së pari anulohej procesi i sotëm për kreun e ri të PD, dhe së dyti kërkohej çregjistrimi i Lulzim Bashës si kryetar nga regjistri i partive politike.
Discussion about this post