Lulzim Basha, ish-Kryetar i PD-së, i cili në 29 korrik pritet të marrë drejtimin e Partisë Demokratike zyrtare, ka vijuar serinë e takimeve në Dibër, nga ku ka ripërsëritur propozimet e tij për listat e hapura, vettingun e politikanëve, votën e diasporës, kufizimin e mandateve dhe zgjedhjen e Presidentit nga populli.
Basha tha se fundi i pandëshkueshmërisë së korrupsionit dhe krimit në nivelet e larta është i vetmi fillim i vërtetë i ndryshimit të Shqipërisë.
Sipas tij, mënyra më e thjeshtë për të hetuar një çështje ku dyshohet se një figurë, në këtë rast politike është përfshirë në afera korruptive, ndiq paranë.
“Shiko çfarë shpenzon. Shiko pronat e tij dhe familjarëve të tij.
Ndiq paranë por dhe lidhjet me krimin është thelbi i vetting-ut të politikanëve. Vetëm kështu para shqiptarëve do të tregohet kush është i pastër e kush jo”, tha ai.
Në vijim, referuar dosjes së SPAk për Arben Ahmetajn, Basha tha se ajo tregon se si qeveria vepronte si organizatë kriminale.
“Kjo dosje tregoi dhe njëherë se duhet një paketë ligjore radikale kundër krimit dhe korrupsionit qeveritar, duke i hequr çdo pengesë dhe dhënë mbështetje të pakushtëzuar SPAK, duke nisur me:
🔘 Hetimi i mashtrimeve me kontratat dhe fondet publike;
🔘 Hetimi pa asnjë përjashtim i kontratave koncesionare;
🔘 Hetimi i pasurive të çdokujt që është përfshirë në hartimin, miratimin dhe përfitimin e kontratave koncesionare, nga juristi i thjeshtë deri tek kryeministri;
🔘 Paratë që u janë vjedhur shqiptarëve dhe kanë përfunduar në llogari bankare, apo janë investuar kudo nëpër botë, duhet t’u kthehen shqiptarëve.
Ajo që i dhemb më shumë botës së krimit dhe të korruptuarve është sekuestrimi i pasurive”, theksoi Basha.
Discussion about this post