Deputeti demokrat Belind Këlliçi, bëri me dije se thuajse një muaj e gjysmë më parë i ka dorëzuar dorëheqjen e tij Lulzim Bashës, duke njoftuar se nuk do ta drejtojë më Forumin Rinor të Partisë Demokratike.
Sipas tij kryedemokrati Basha ka shkelur statutin me hapjen e garës për kryetarin e ri të FRPD-së.
“Para një muaji e gjysmë, unë i kam dorëzuar Bashës dorëheqjen në zyrë. Dorëheqja më është refuzuar në një farë mënyrë. Unë po e them sot këtu, ciklin tim, misionin tim në Forumin Rinor, e kam mbyllur. Unë nuk jam i ngjitur në karrigen e FRPD. Shpallja e tyre është antistatutore. Në asnjë nen statuti nuk i jep kompetencë kryetarit për të çelur garën në një organizatë partnere”, tha Këlliçi.
Vendimi për të marrë pjesë në foltoren e Berishës, sipas Këlliçit qarkullonte prej ditësh dhe nuk ishte surprizë për askënd.Ndërkohë në lidhje me situatën aktuale të PD-së ai theksoi se po krijohet një përçarje e panevojshme, pasi po hiqet vëmendja nga problemi i madh që kjo parti ka.
“Që ka një arsye mbrapa këtij vendimi, ka. Kanë qenë po ky Forum Rinor, po këta të rinj që kanë qenë në fushatë në çdo qytet të Shqipërisë. Fjala që unë do të merrja pjesë në Foltoren e Berishës qarkullonte prej ditës, ka qenë një vendim i imi personal, i komunikuar edhe me partnerët ndërkombëtarë, nuk ka qenë një surprizë. Në asnjë moment, unë nuk jam kundër zgjedhjeve dhe riorganizimit të Forumit Rinor, i cili është i vonuar, por këtu po tentohet të hiqet vëmendja nga problemi i madh që ka PD. Po krijohet një përçarje e panevojshme në PD.
Gjatë fjalës së tij në foltoren me të rinjtë në Tiranë, Sali Berisha riktheu në vëmendje një episod të ndodhur në vitin 2017, kur Lulzim Basha e la jashtë listës së deputetëve, kreun e FDPD-së, Belind Këlliçi. Berisha deklaroi se Basha e la Belindin jashtë parlamentit, pasi kishte frikë se mos po i zinte vendin.
Discussion about this post