Nga Pogradeci ku ka zhvilluar një takim me qytetarë, deputeti Lulzim Basha, ish-kreu i PD-së, i cili në 29 korrik pritet të marrë drejtimin e Partisë Demokratike zyrtare ose të vulës, ka ripërsëritur si një domosdoshmëri listat e hapura, vettingun në politikë, kufizimin e mandateve dhe votën e diasporës.
Basha tha se për këtë duhet të bëjmë gjithçka mundemi, bashkë me çdo shqiptar, të majtë e të djathtë, për të bërë të mundur këto ndryshime, duke kërkuar edhe referendum.
“Sot është e qartë. Ata që duan monopol mbi politikën, median, ekonominë dhe duan që Shqipëria të mbetet në duart e tyre, janë kundër vetting-ut, janë kundër llogaridhënies për pasuritë e tyre dhe lidhjet me krimin, që përdorin në çdo palë zgjedhje.
Mjafton të shihen dosjet e korrupsionit të Ahmetajt, ministrave, deputetëve dhe kryebashkiakëve të Edi Ramës për të kuptuar si i vjedhin paratë e shqiptarëve, si e përdorin krimin për të blerë zgjedhjet, si kriminelët përcaktojnë përfaqësuesit e tyre në Kuvend, si shteti i tyre funksionon si një organizatë kriminale”, u shpreh Basha.
Sipas tij, sot është koha të hapim letrat dhe të tregojmë pasurinë e çdo politikani, të shohim a i justifikojnë apo jo!
“Sot është koha që shqiptarëve t’u japim mundësinë të zgjedhin përmes votës se drejtpërdrejt deputetët e tyre.
Partia Demokratike mund dhe do ta sjellë këtë ndryshim, duke u bashkuar përmes vlerave dhe ideve në Aleancën Qytetare për Demokracinë, nëpërmjet së cilës mund të formojmë një shumicë që tejkalon ndarjet politike, për të bërë ndryshimet kushtetues që u japin forcë dhe pushtet qytetarëve për të ndërtuar të ardhmen që meritojnë”, tha Basha.
Discussion about this post