Lulzim Basha, ish-Kryetar i PD-së, u shpreh se paratë që u janë vjedhur shqiptarëve dhe kanë përfunduar në llogari bankare, apo janë investuar kudo nëpër botë, duhet t’u kthehen shqiptarëve.
Basha u shpreh se ky duhet të jetë hapi i dytë i domosdoshëm pas hetimit dhe dënimit të personi që ka abuzuat me fondet publike.
“Është e domosdoshme të kryhet hetimi pa asnjë përjashtim i kontratave koncesionare dhe i pasurive të çdokujt që është përfshirë në hartimin, miratimin dhe përfitimin e kontratave koncesionare, nga juristi i thjeshtë tek kryeministri”, theksoi Basha, gjatë një takimi në zonën e Kombinatit.
Në vijim ai u shpreh se pezullimi i granteve për bujqësinë të programit IPARD nga ana e Komisionit Europian tregon se si kjo qeveri nuk ndalet së abuzuari as me fondet e BE.
“SPAK duhet të hetojë pa humbur kohë skemat korruptive”, tha Basha.
Në vijim deputeti demokrat u shpreh se kjo mazhorancë, e zhytyr në skandale korruptive, arrin deri në dhunimin e parlamentarizmit vetëm për të kontrolluar edhe Akademin e Shkencave.
“Të gjithë politikanët duhet t’i nënshtohen vetting-ut, hetimit të pasurive të tyre dhe familjarëve të tyre si dhe marrëdhënieve me persona të botës së krimit.
Shqipëria e ka jetike ndryshimin dhe këtu nuk bëhet fjalë për ndryshim karrigesh, por ndryshimin e sistemit dhe rritjen e kontrollit dhe llogaridhënies.
Krahas mbështetjes për SPAK, për të hetuar deri në fund aferën korruptive të Inceneratorëve, ku është zhytur e gjithë qeveria dhe aferave të tjera që janë nën hetim – duhet të rrisim fuqinë e qytetarëve në vendimmarrje dhe të Parlamentit në kontrollin e qeverisë”, tha Basha.
Në vijim ai shtoi se duhet të ndryshojmë formulimin e Mocionit të besimit dhe atë të mosbesimit, numri i ministrive dhe rritja e Borxhit Publik të bëhen me ligj nga Parlamenti, heqjen e kontrollit politik ndaj punonjësve të administratës, duke u dhënë atyre siguri në punë, zgjedhjen e drejpërdrejt të Presidentit nga populli, si mbartës dhe balancues i pushteve.
Discussion about this post